مەودا میدیا-

وه‌زاره‌تی گواستنه‌وه‌ و گه‌یاندنی حکومەتی هەرێمی کوردستان رایگه‌یاند، بڕیاردراوه‌ له‌ 25ی ئه‌م مانگەوە بەهۆی دەستپێکردنی تاقیكردنه‌وه‌كانی پۆلی 12ی ئاماده‌یی خزمه‌تگوزاریه‌كانی ئینته‌رنێت له‌ كاتی ئەنجامدانی تاقیکردنەوەکاندا رابگیرێت.

لە راگەیەندراوێکدا وه‌زاره‌تی گواستنه‌وه‌ و گەیاندنی حکومەتی هەرێمی کوردستان رایگەیاند "ئه‌مڕۆ سێشەممە 13ی تەموزی 2020  به ‌ئاماده‌بوونی ئانۆ جه‌وهه‌ر، وه‌زیری گواستنه‌وه‌، كاروان ره‌زا ئه‌حمه‌د به‌رێوه‌به‌ری گشتی پۆسته‌ و گه‌یاندن و نوێنه‌رانی سه‌رجه‌م كۆمپانیاكانی بواری خزمه‌تگوزاری گه‌یاندن له‌ دیوانی وه‌زاره‌ت كۆبوونه‌وه‌یه‌ك ئه‌نجامدرا و بڕیاری راگرتنی هێڵەکانی ئینتەرنێت درا لە کاتی ئەنجامدانی تاقیکردنەوەکانی پۆلی 12ی ئامادەیی".

ئەوەش خراوەتەڕوو‌ "وێڕای دووپاتكردنه‌وه‌ی په‌یوه‌ندی و هه‌ماهه‌نگی نێوان وه‌زاره‌ت و كۆمپانیاكانی گه‌یاندن، ئامانجی سه‌ره‌كی كۆبوونه‌وه‌كه‌ راگرتنی خزمه‌تگوزاریه‌كانی ئینته‌رنێت بوو له‌كاتی ئه‌نجامدانی ئه‌زموونه‌كانی ئه‌مساڵ، ئه‌ویش به‌ هه‌ماهه‌نگی وه‌زاره‌تی په‌روه‌رده‌ بۆ رێگریكردن له‌ دیارده‌كان و شێوازه‌كانی غش (قۆپیه‌) كردن له‌ ئه‌زمونه‌كانی ئه‌مساڵ به‌ تایبه‌ت قۆناغی 12ی ئاماده‌یی كه‌ بریاره‌ 25ی ئه‌م مانگه‌ به‌ڕێوه‌بچێت".

ئاماژە بەوەشدراوە "له‌كۆبوونه‌وه‌كه‌دا قسه‌وباس كرا له‌سه‌ر كێشه‌ و ناڕه‌زایی هاوڵاتییان و به‌كارهێنه‌رانی هێڵه‌كانی گه‌یاندن به‌ تایبه‌ت خزمه‌گوزاری ئینته‌رنێت كه‌ پێویسته‌ باشتر بكرێن و به‌دواداچوونیان بۆ بكرێت".

ئەوەش لە کاتێکدایە ساڵانە لە کاتی ئەنجامدانی تاقیکردنەوە گشتییەکانی پۆلی 12ی ئامادەیی هێڵەکانی ئینتەرنێت لەکار دەخرێن بۆ رێگریکردن لە دیاردەی (قۆپیە)کردن.

ر.ر