مه‌ودا میدیا-

ئێواره‌ی ئه‌مڕۆ داعش هێرشی كرده‌ سه‌ر كامپی شه‌هید رۆسته‌م جوودی له‌ مه‌خمور، تا ئاماده‌كردنی ئه‌م هه‌واڵه‌ شه‌ڕ به‌رده‌وامه‌.

رێبوار ساڵح، به‌رپرسی كۆمیته‌ی مه‌خموری حزبی شیوعی كوردستان به‌ مه‌ودا میدیای راگه‌یاند "ئێواره‌ی ئه‌مڕۆ یه‌كشه‌ممه‌ داعش 2 شوانی رفاندووه‌ كه‌ نیشته‌جێی كامپی شه‌هید رۆسته‌م جوودین دوای ئه‌وه‌ شه‌ڕ له‌ نێوان چه‌كدارانی داعش و پاسه‌وانانی كامپه‌كه‌ روویداوه‌ و تا ئێستا شه‌ڕه‌كه‌ به‌رده‌وامه‌".

به‌رپرسی كۆمیته‌ی مه‌خموری حزبی شیوعی كوردستان وتی "به‌پێی ئه‌و زانیارییانه‌ی به‌رپرسانی ناو كامپه‌كه‌ به‌ ئێمه‌یان داوه‌ 2 چه‌كداری داعش كوژراون و یه‌كێك له‌ دانیشتووانی ناو كامپه‌كه‌ شه‌هید بووه‌ و 3 ی تر برینداربوون".

مه‌ودا میدیا چه‌ند جارێك په‌یوه‌ندی كرد به‌ به‌رپرسانی كامپی شه‌هید رۆسته‌م جوودی ته‌نها زانیاری روودانی شه‌ڕه‌كه‌یان پشتڕاستكرده‌وه‌ و ئاماده‌نه‌بوون ورده‌كاری زیاتر بخه‌نه‌ روو.