مەودا میدیا-

حوکمی سێدارەی هاوڵاتییەکی کورد لە بەندیخانەی شاری برووجێرد سەر بە پارێزگای لوڕستان جێبەجێ کرا کە 4 ساڵ پێش بە تۆمەتی بازرگانی کردن بە ماددەی هۆشبەرەکان دەستبەسەر کراوە.

بەپێی راپۆرتی رێکخراوی مافی مرۆڤی هەنگاو، بەرەبەیانی دوێنی یەکشەممە 2ی شوباتی 2020 حوکمی سێدارەی هاوڵاتییەکی خەڵکی کرماشان بە ناوی "رەسووڵ مەلاحەسەنی" تەمەن 39 ساڵ لە بەندیخانەی شاری برووجێرد جێبەجێ کراوە.

رێکخراوی مافی مرۆڤی ئێران رایگەیاندووە "کە رەسووڵ مەلاحەسەنی 4 ساڵ پێش بە تۆمەتی بازرگانی کردن بە ماددەی هۆشبەرەکان دەستبەسەر و حوکمی سێدارەی بە سەردا سەپاوە".

لەسێدارەدانی ئەو بەندکراوە لە بەندیخانەی شاری برووجێرد هەتا کاتی ئامادەکردنی ئەم هەواڵە لەلایەن سەرچاوە فەرمییەکانی حکومەتی ئێرانەوە بڵاو نەکراوەتەوە.

بەپشتبەستن بە ئاماری تۆمارکراو لە ناوەندی ئاماری ڕێکخراوی مافی مرۆڤی هەنگاو، لە ماوەی یەک ساڵی رابردوو واتە ساڵی 2019 حوکمی سێدارەی نزیکەی 52 هاوڵاتی کورد لە بەندیخانەکانی ئێران جێبەجێ کراوە.