مەودا میدیا-

 

وه‌زیری پێشمه‌رگه‌ی حکومەتی هەرێمی کوردستان رایگەیاند،  چاکسازی لەوەزارەتی پێشمەرگە بەردەوام دەبێت و ناوەستێت.

 

ئه‌مڕۆ 27ی ته‌مووزی 2021 شۆڕش ئیسماعیل، وه‌زیری پێشمه‌رگه‌ی حکومەتی هەرێمی کوردستان، له‌میانی ژماره‌یه‌ك دیدارو كۆبوونه‌وه‌‌دا رایگەیاند، وەزارەتی پێشمەرگە بەردەوامە لە چاکسازی و ناوەستێت و دووپاتی كرده‌وه،‌ له ‌به‌رنامه‌ی داهاتوودا به‌شێوه‌یه‌كی تۆكمه‌ و باشتر له‌ هاوكاری و هه‌ماهه‌نگی له‌گه‌ڵ سوپای عێراق و پێشمه‌رگه‌ به‌رده‌وام ده‌بن و پێویستده‌كات له‌ ئاینده‌دا هه‌ماهه‌نگی و كاركردنی هاوبه‌شانه‌ی نێوانماندا هەبێت.

 

وه‌زیری پێشمه‌رگه‌ ستایشی هه‌وڵ و هه‌نگاوه‌كانی راوێژكارانی سه‌ربازی هاوپه‌یمانانی كرد كه‌ به‌رده‌وام و دڵسۆزانه‌ له‌ هاوكاری و هه‌مه‌ئاهه‌نگی وه‌زاره‌تی پێشمه‌رگه‌ به‌رده‌وامن، وتیشی، "رۆڵی ئێوه‌ جێی بایه‌خ و گرنگی زۆری ئێمه‌یه‌ له ‌پێشخستنی توانا سه‌ربازیی و لۆجیستیه‌كانی هێزی پێشمه‌رگه‌ی كوردستان". 

 

ئەوەشیخستەڕوو، هه‌نگاوه‌كان به‌ئاراسته‌یه‌كی دروست هه‌نگاو ده‌نێن و ده‌رئه‌نجامی باشیشی به‌ده‌سهێناوه‌ بۆ  پرۆسه‌ی چاكسازی لە وەزارەتی پێشمەرگەدا و به‌رده‌وام  ده‌بێت.

 

لە لایەکی دیکەوە كۆلۆنێل چارلی، فه‌رمانده‌ی هێزه‌كانی به‌ریتانیا له‌هه‌ولێر رایگەیاند،  پاڵپشتیەکانمان بۆ وەزارەتی پێشمەرگە بەردەوامی ده‌بێت و لەم رێگەیەوە پڕۆژەی باشتری سەربازی بۆ هێزی پێشمەرگە جێبەجێ دەکەین و هەوڵه‌كانیشمان له‌پێناو به‌دیهێنانی ئامانج و ناوه‌ڕۆكی رێفۆرمی چاكسازییه‌‌ به‌هه‌ماهه‌نگی هه‌ردوولا. 

 

ر.ر