مەودا میدیا-

گۆزروانە یەكێكە لەو گیایانەی كە لە وەرزی زستان و بەهار دەكەوێتە بازاڕەوە و لە لایەن هاوڵاتیانەوە خواستی لەسەرە و سودێكی زۆریشی هەیە بۆ تەندروستی هاوڵاتیان.

مەلیحە ئەحمەد، لە شەقامی مەولەوی شاری سلێمانی لەبەردەم بەلەدیەكە گۆزراوەنە دەفرۆشێت بە مەودا میدیای راگەیاند "لە وەرزی زستان گۆزراوەنە كە گیایەكی سروشتى تەندروستە و هاوڵاتیان زۆر بەكاری دەهێنن دەكەوێتە بازارەوە و خواستێكی زۆری لەسەرە".

ئەوەشی خستەڕوو "گۆزراوەنە بەشێوازی كوڵاندن دەخورێت بەشێك لە هاوڵاتیان بەشێوەی سوركردنەوە بەكاری دەهێنن و تامێكی خۆشی هەیە و  سودی تەندروستی زۆرە بەتایبەت بۆ ناو سك و پاككردنەوەی ناو سك".

باسی لەوەشكرد "بەهەمان شێوەی گیان بەهاریەكانی تر كە ئەوانیش لەگەڵ هاتنی وەرزی بەهار دەكەونە بازاڕەوە گۆزروانەش خواردنێكی سروشتییە و گرنگە هاوڵاتیان ئەگەر لە ماوەی پێگەشتنی جارێك یان دووجار بەكاری بهێنن، چونكە هەموو گیاكان سودی خۆیان هەیە".

لە دوای تەواوبونی یەك مانگی وەرزی زستان و لەگەڵ هاتنی مانگی 3 گیا بەهاریەكان دەكەونە بازاڕەوە و خواستێكی زۆریان لەسەرە و بەشێك لەوانەش وەك چارەسەر بۆ نەخۆش بەكاردەهێنرێن.