مەودا میدیا-

به‌مه‌به‌ستی ئه‌نجامدانی پرۆژه‌یه‌ك بۆ راكێشانی هێڵی 132 كه‌ی ڤی نێوان وێستگه‌ی به‌رهه‌مهێنانی كاره‌بای كاشێ و به‌ستنه‌وه‌ی به‌ وێستگه‌یه‌كی گۆڕینی كاره‌با گرێبه‌ستێك بۆ ئه‌نجامدانی پرۆژه‌یه‌كی گرنگی راكێشانی كاره‌با به‌درێژایی 50 كیلۆمه‌تر ئیمزا كرا.

ئه‌مڕۆ دووشه‌ممه‌ 17ی شوباتی 2020 ئه‌ندازیار كه‌مال محه‌مه‌د ساڵح وه‌زیری كاره‌با گرێبه‌ستێكی له‌گه‌ڵ هه‌ردوو كۆمپانیای ( ستێر- شاندز) به‌گوژمه‌ی نۆ ملیۆن و شه‌ش سه‌دوو بیست هه‌زار دۆلار ئیمزا كرد، له‌ رێوره‌سمی واژووكردنی گرێبه‌سته‌كه‌دا وه‌زیری كاره‌با رایگه‌یاند : خه‌ڵكی زاخۆ شایه‌نی پرۆژه‌و كاری گه‌وره‌ن و چه‌ندین ساڵه‌ وێڕای گه‌وره‌بوون و فراوانبوونی شاره‌كه‌یان ژێرخانی گواستنه‌وه‌ی كاره‌بایان به‌پێی پێویست نییه‌ راكێشانی ئه‌م هێڵه‌ش سوودێكی زۆری بۆ به‌كارخستنی ئه‌و وێستگه‌یه‌ ده‌بێت كه‌ ته‌واو بووه‌و به‌هۆی قه‌یرانی دارایی و شه‌ڕی داعشه‌وه‌ نه‌توانراوه‌ ببه‌سترێته‌وه‌ به‌ وێستگه‌كانی به‌رهه‌مهێنانی كاره‌باوه‌، له‌ته‌وه‌رێكی قسه‌كانیدا وه‌زیری كاره‌با داوای له‌ هه‌ردوو كۆمپانیا كرد له‌ماوه‌ی دیاریكراوی خۆیدا كه‌ 180 رۆژه‌ و به‌بێ دواكه‌وتن ئه‌و پرۆژه‌یه‌ ئه‌نجام بدرێت و پابه‌ندی كوالێتی به‌رزو رێنمایی و راسپارده‌كانی وه‌زاره‌ت بن.

له‌لایه‌كی دیكه‌وه‌، هه‌ر ئه‌مڕۆ ئه‌ندازیار كه‌مال محه‌مه‌د ساڵح، وه‌زیری كاره‌با گرێبه‌ستێكی له‌گه‌ڵ كۆمپانیای ( هێرۆ) به‌گوژمه‌ی شه‌ش ملیۆن و حه‌وت سه‌د هه‌زار دۆلار ئیمزا كرد، بۆ چاره‌سه‌ركردنی ئاسته‌نگی گواستنه‌وه‌ی وزه‌ی كاره‌با بۆ ته‌واویی ده‌ڤه‌ری سۆران و گۆڕینی ته‌ل و زیادكردنی توانای وێستگه‌ی (سۆران -1)، كه‌ به‌پێی ئه‌م گرێبه‌سته‌ له‌ماوه‌ی 180 رۆژدا كۆمپانیای ناوبراو به‌درێژی 16 كیلۆمه‌تر هه‌ڵده‌ستێت به‌ راكێشانی هێڵه‌كه‌و گۆڕینی ته‌لی گه‌یه‌نه‌رو زیادكردنی توانای به‌شێكی وێستگه‌كه‌.