مەودا میدیا-

لەبارەی رووداوی گیان لەدەستدانی شنیار ئەنوەرەوە سەرۆکی ئەنجومەنی وەزیرانی هەرێمی کوردستان پەیامێکی بڵاوکردەوە رایگەیاند، نیگەرانە لەو توندوتیژیانەی دژ بەژنان دەکرێت و "هیچ شه‌رەفێک له‌ ژن كوشتندا نییه‌".

مەسرور بارزانی، سەرۆکی ئەنجومەنی وەزیرانی هەرێمی کوردستان سەبارەت بە رووداوی گیان لەدەستدانی شنیار ئەنوەر بەهۆی ئەوەی لەلایەن هاوسەرەکەیەوە سوتێندراوە  لە پەیامێکدا رایگەیاند "زۆر نیگەران و خه‌مبارم به‌ رووداوەکانی ئەم دواییەی توندوتیژی دژ بە ژنان و ئافرەتان لە هەرێمی کوردستان، لێره‌دا دووباره‌ی ده‌كه‌مه‌وه‌ كه‌ هیچ شه‌رەفێک له‌ ژن كوشتندا نییه‌".

ده‌قی په‌یامه‌كه‌

زۆر نیگەران و خه‌مبارم به‌ رووداوەکانی ئەم دواییەی توندوتیژی دژ بە ژنان و ئافرەتان لە هەرێمی کوردستان. لێره‌دا دووباره‌ی ده‌كه‌مه‌وه‌ كه‌ هیچ شه‌رەفێک له‌ ژن كوشتندا نییه‌.

لەگەڵ وەزیری ناوخۆ لەسەر رووداوی دڵته‌زێنی شنیار خان گفتوگۆمان كرد و ستایشی كارمه‌ندانی پۆلیسم کرد بۆ دەستگیرکردنی تاوانباره‌كه‌ و پشتگیری خۆمم بۆ سزادانی تاوانباران دووپات کردەوە.

تەنیا لەم ساڵەدا، 9 ئافرەتی بێتاوان ‌لە ئەنجامی توندوتیژی خێزانییەوە کوژراون، ئەم تاوانانە‌ ده‌بێت بوەستن و وەک خەڵکی کوردستان، نابێت قبوڵی بکەین، وەک حکومەتیش ئێمە ھاوکار و پاڵپشتی دادگە دەبین لەسەپاندنی توندترین سزا بۆ ئەم تاوانانە.

من سوورم لە سەر پاراستنی هەموو ژن و کچ و منداڵێک كه‌ له‌ مه‌ترسیدان. دەزانم کە پێویستی بە کات و پابەندبوونێكی جدی هەیە، ھەربۆیە بنبڕکردنی ئەم دیاردە نامرۆڤانەیە، پێویستی بە به‌شداریی هه‌موومان هەیە وەک چالاکانی کۆمەڵگەی مەدەنیی، به‌رپرسان و کەسایەتییە ئاینیی و کۆمەڵایەتییەکان، ھەروەھا پێویستمان بە ئەنجامدانی چاكسازیی لە سیستەمی دادوەریدا ھەیە.

ئێمە ھەموو ھەوڵی خۆمان دەخەینەگەڕ بۆ کۆتاییھێنان بەم تاوانانە .

مەسرور بارزانی

سەرۆکی حکومەتی ھەرێمی کوردستان

ر. ئ.