مەودا میدیا- رێبین ئەشرەف

بەشێک لە تاکسییەکان تائێستا لۆگۆ و لەزگەیان نەکردووە، وتەبێژی وەزارەتی گواستنەوە و گەیاندنیش دەڵێت "داوامان لە وەزارەتی ناوخۆ کردووە لەڕێگەی مەفرەزەکانی بەڕێوەبەرایەتیی گشتیی هاتوچۆی هەرێمی کوردستانەوە رێکاری یاساییان بەرانبەر بگیرێتەبەر".

دیلان رەشید، وتەبێژی وەزارەتی گواستنەوە و گەیاندنی حکومەتی هەرێمی کوردستان سەبارە بە سزای ئەو شۆفێری تاکسییانەی تائێستا لۆگۆ و لەزگەیان نەکردووە بە مەودا میدیای راگەیاند "وەزارەتی گواستنەوە و گەیاندن پێشتر داوای لە وەزارەتی دارایی کردبوو کە رێنمایی دەربکات تایبەت بە دیاریكردنی بڕی سزای دارایی بۆ ئەو شۆفێرانەی لۆگۆیان وەرنەگرتووە".

ئاماژەی بەوەشکرد "لە وەزارەتی گواستنەوەوە نووسراو بۆ وەزارەتی ناوخۆی هەرێمی كوردستان کراوە كە بەڕێوەبەرایەتیی گشتیی هاتوچۆی هەرێمی كوردستان لەڕێگەی مەفرەزەكانییەوە رێكاری یاسایی بەرانبەر ئەو شۆفێرانە بگیرێتەبەر كە لۆگۆیان وەرنەگرتووە".

روونیشیکردەوە "لەئێستادا هیچ کاتێک وەک دوا وادە دیارینەکراوە، تەنها لەڕێگەی مەفەرەزەکانی هاتوچۆوە شۆفێرانی تاکسی ناچاردەکرێن لۆگۆ و لەزگە لە تاکسییەکانیان بدەن".

ر. ئ.