مەودا میدیا- رێبین ئەشرەف

سەبارەت بە بەنزینە عیراقییەکە سەرۆكی ئەنجومەنی پارێزگای سلێمانی رایگەیاند، بڕیاردراوە بەشی زۆرینەی بەنزینە عیراقییەكە بدرێتە ئۆتۆمبێلی تاكسی و پاسەكان، دەشڵێت "دوای دیاریكردنی بەنزینخانەكان، بڕیارەكە ‏جێبەجێدەكرێت".

ئازاد محەمەد ئەمین، سەرۆكی ئەنجومەنی پارێزگای سلێمانی ئەمڕۆ پینجشەممە 17ی ئادار بە مەودا میدیای راگەیاند "ئەمڕۆ كۆبوونەوەیەك لەنێوان ئەنجومەنی پارێزگا، ‏قایمقامییەتی سلێمانی، بەڕێوەبەرایەتیی نەوت و كانزاكان و نوێنەرانی شۆفێران لەبارەی ‏نیگەرانییەكانی شۆفیرانی تاكسی سەبارەت بە بەرزبوونەوەی نرخی سووتەمەنی ‏بەڕێوەچوو".‏

دووپاتیشیکردەوە "کە بڕیاردرا ئەو بەنزینە عیراقییەی كە بەنرخی 690 دینار دەدرایە ‏شۆفێران، لەمەودوا بەشی زۆرینەی بدرێتە ئۆتۆمبێلی تاكسی و پاسەكان".

ئاماژەی بەوەشكرد "لەگەڵ خاوەنی بەنزینخانەكان ‏كۆبوونەوەیەك ئەنجامدەدەین سەبارەت بە دیاریكردنی میكانیزمێك بۆ دابەشكردنی بەنزینە ‏عیراقییەكە و دواتر بڕیارەكە دەخرێتە بواری جێبەجێكردنەوە".

ر. ئ.