مەودا میدیا-

جارێکی دیکە نرخی نەوتی خاو بەرزبووەوە و نرخی نەوتی برێنت بە 121.09 دۆلار مامەڵەی پێوەدەکرێت، ئەوەش بەرزبوونەوەیەکی بەرچاوی بەهای وزەیە دوای ئەوەی هەفتەی رابردوو نرخی بەرمیلێک نەوت بە 93 دۆلار بوو.

ئەمڕۆ چوارشەممە 23ی ئاداری 2022 بەهای نەوتی خاو لە بازارەکانی جیهان بەرزبوونەوەی بەخۆیەوە بینی، بەجۆرێک نرخی بەرمیلێک نەوتی برێنت  4.55% بەرزبووەوە و ئێستا بە 121.09 دۆلار مامەڵەی پێوەدەکرێت، هه‌روه‌ها نه‌وتی خاوی تێكساسیش 4.44% بەرزبووەوە و بە 114.09 دۆلار مامەڵەی پێوەدەکرێت.

هۆکاری ناجێگری بەهای نەوت بۆ بەردەوامی گرژییەکانی نێوان رووسیا و ئۆکرانیا دەگەڕێتەوە، بەتایبەت کە لە چەند کاتژمێری رابردوو هێرشی سەربازی رووسیا بۆ سەر ئۆکرانیا پێشڕەوی زیاتری بەخۆیەوە بینیوە و سزاکانی وڵاتانی رۆژئاواش بۆسەر مۆسکۆ تادێت چڕتردەبنەوە.

هاوکات هۆکارێکی دیکەی ناجێگری بەهای نەوت پەیوەندی هەیە بە ئاماژەی ئەرێنی سەبارەت بە گفتوگۆکانی نێوان ئەمەریکا و ئێران سەبارەت بە رێککەوتنە ئەتۆمییەکەی تاران، بەجۆرێک ئەگەر هەردولا بگەنە رێککەوتن، سزای سەر کەرتی نەوتی ئێران هەڵدەگیرێت.

ر. ئ.