مەودا میدیا-

بەڕێوەبەرایەتیی بەرگریی شارستانیی سلێمانی لەبارەی گەڕان بە دوای سێ گەنجە بێسەروشوێنەکەی چەمی خەمەڵۆکەی قەزای ماوەت راگەیەندراوێکی بڵاوکردەوە.

ئەمڕۆ پێنجشەممە 24ی ئاداری 2022 لە راگەیەندراوێکدا بەڕێوەبەرایەتیی بەرگریی شارستانیی سلێمانی راگەیاند "ئەمڕۆ بۆ رۆژی سێیەم گەڕان بەردەوام بوو بۆ دۆزینەوەی ئەو سێ گەنجەی كە لە یەكەم رۆژی نەورۆز لە چەمی خەمەڵۆكەی سەر بە قەزای ماوەتی شارباژێر بێ سەروشوێنبوون".

ئاماژە بۆئەوەكراوە "كە بەسەرپەرشتی بەڕێوەبەرەكەمان و بە هاوكاری تیمی فڕۆكەوانی و تیمەكانی غەواسی بەرێوەبەرایەتیمان لە بنكەكانی (دوكان و ئاغجەلەر و چەمچەماڵ و بنكەی ماوەت) هەستاوین بە گەڕان بە چەمەكە بەدرێژایی زیاتر لە 10 كیلۆمەتر بە پیادەڕەوی".

لە راگەیەندراوەکەدا ئەوەش هاتووە "بەوپەڕی خەمخۆری و هێز و توانامانەوە تیمەكانیان لەكاردان و لەگەڵیاندا دەمێنینەوە و بەردەوام دەبین تاوەكو دەگەین بە ئەنجامێك".

س،ر