مەودا میدیا- رێبین ئەشرەف

بەپێی زانیارییە دزەپێکراوەکان وەزارەتی دارایی و ئابووری حکومەتی هەرێمی کوردستان داوای لە گەنجینەکان کردووە بەپەلە خشتەی مووچەی مانگی سێی وەزارەتەکان ئامادەبکەن، بەڕێوەبەری گەنجینەی یەکی سلێمانیش دەڵێت "دەستیان کردووە بە وردبینی لە خشتەی مووچەدا و لەگەڵ ئامادەبوونی دەینێرین بۆ وەزارەتی دارایی".

بەپێی زانیارییەکانی مەودا میدیا وەزارەتی دارایی لە دوێنێ یەکشەممەوە داوای لە گەنجینەکان کردووە بەپەلە خشتەی مووچەی مانگی سێیان بۆ ئامادەبکەن و بۆیان رەوانەبکەن، حەسەن رەشید، بەڕێوەبەری گەنجینەی یەکی سلێمانیش زانیارییەکانی بۆ مەودا میدیا پشتراستکردەوە و  وتی "دەستکراوە بە وردبینیی خشەتی مووچەی مانگی سێی وەزارەت و فەرمانگەکان و هاوشێوەی مانگی رابردوو لیستەکان وردبینی دەکرێن".

ئاماژەی بەوەشکرد "چەند فەرمانگەیەک وردبینییەکانیان تەواوکردووە و هەرکات کۆی فەرمانگەکان تەواوبوون خشتەکان رەوانەی وەزارەتی دارایی و ئابووری دەکەین".

ئەوەش لەکاتێکدایە پێشتریش جوتیار عادل، وتەبێژی حکومەتی هەرێمی کوردستان لە لێدوانێکی رۆژنامەوانیدا رایگەیاندبوو "لەسەرەتای مانگی چوار دەست بە دابەشکردنی مووچەی مانگی سێ دەکرێت".

ر. ئ.