مەودا میدیا- 

یەکێتی زانیانی ئایینی ئیسلامی کوردستان داوا لە خێرخوازان دەکات هاوکاریی هەژاران بکەن بەتایبەت خانەی بێ سەرپەرشتان.

ئەمڕۆ سێشەممە یەکێتی زانایان پەیامێکی بڵاوکردەوە تێیدا هاتووە " بە پێویستی دەزانین داوا لە سەرمایەدار و خێرخوازان بکەین، بە زەکات و بەخشینەکانیان خانەی نەوجەوانان و بێ سەرپەرشتان لە یاد نەکەن، کە کۆمەکی کردنیان زۆر خێرە و کارێکی مرۆیی گەورەیە".

ده‌قی په‌یامه‌كه‌:

بەناوی خوای گەورەو میهرەبان

((وَتَعَاوَنُواْ عَلَى الْبرِّ وَالتَّقْوَى وَلاَ تَعَاوَنُواْ عَلَى الإِثْمِ وَالْعُدْوَانِ)) المائدة:2

ساڵانە لەگەڵ هاتنەوەی مانگی پیرۆزی رەمەزان، نەریتی کۆمەڵگەی کوردی بەگشتی و موسڵمانان بەتایبەتی وایە، گیانی هاوکاری و خێر و بەخشینەوەی کۆمەکی و خواردن و شیرینی دەکەنە سیمایەکی جوانی کۆمەڵایەتی و بەنیەتی رەزامەندی خوا و بەجێگەیاندنی ئەرکی ئایینی ئەم کارە ئەنجام دەدەن.

ئێمە لە یەکێتی زانایان دەستخۆشی زۆرمان بۆ سەرجەم دەزگا و کەسایەتی خێرخواز و خواپێداوان هەیە لەبەرانبەر ئەم کارو هەنگاوە خێرخوازی و ئیمانی و ئینسانیەی پێشکەشی دەکەن.

هەر لێرەشەوە بە پێویستی دەزانین داوا لە سەرمایەدار و خێرخوازان بکەین، بە زەکات و بەخشینەکانیان خانەی نەوجەوانان و بێ سەرپەرشتان لە یاد نەکەن، کە کۆمەکی کردنیان زۆر خێرە و کارێکی مرۆیی گەورەیە، لەهەمان کات بەپێی شەریعەتی ئیسلام دروستە زەکات بدرێت بە نەوجەوانان و بێ سەرپەرشتان، بەو مەرجەی لە خودی خۆیان خەرج بکرێت.

یەکێتی زانایانی ئایینی ئیسلامی کوردستان

(5ـی نیسان / ئه‌پرێلی 2022)

ر. ئ.