مەودا میدیا-

بەڕێوەبەرایەتیی تەندروستیی چەمچەماڵ رایگەیاند، لە دوو رووداوی هاتوچۆدا لەسەر رێگەی سلێمانی- چەمچەماڵ كەسێك گیانی لەدەستدا و دوو كەسی دیكە برینداربوون.

بەڕێوەبەرایەتیی تەندروستیی چەمچەماڵ لە راگەیەندراوێكدا ئاماژەی بەوەکرد، یەكێك لە رووداوەكان لەسەر رێگەی سلێمانی-چەمچەماڵ و نزیك وێستگەی كارەبای غازی چەمچەماڵ بووە و كەسێك برینداربووە.

لە راگەیەندراوەكەدا هاتووە، رووداوی دووەم نزیك مۆنۆمێنتی ئەنفال بووە كە كەسێكی تەمەن 56 ساڵان گیانی لەدەستداوە و كەسێكی دیكە برینداربووە.

رووداوەکانی هاتوچۆ لە هەرێمی کوردستان هۆکارێکی سەرەکین بۆ مردن و برینداربوون شارەزایانیش هۆکارەکەی بۆ تیژڕەوی شۆفێران و خراپی رێگەوبانەکان دەگێڕنەوە.

ر. ئ.