مەودا میدیا-

پۆلیسى سلێمانى دۆزینەوەى کچێکى ونبووى راگەیاند کە دانیشتووى شارى هەولێرە و کەسوکارەکەى بەدوایدا دەگەڕان.  

بەرێوەبەرایەتیی پۆلیسی پاریزگای سلێمانی رایگەیاند "دوای ئەوەی  هاوڵاتییەکی دانیشتووی هەولێر سەردانی بەڕێوەبەرایەتیی پۆلیسی پارێزگای سلێمانی کرد و رایگەیاند کە کچەکەی لەماڵ هاتۆتەدەرەوە و نەگەڕاوەتەوە و گومانی دەکرد بەرەو شاری سلێمانی هاتبێت، دەستبەجێ بەڕێوەبەری پۆلیسی پارێزگای سلێمانی سەرجەم بەش و بنکەکانی راسپارد بۆ لێکۆڵینەوە و بەدواداچون بۆ کێشەی هاوڵاتییەکە".  

  

ئاماژەی بەوەشکرد "پاش لێکۆڵینەوە و گەڕان و بەدواداچونەکان توانرا لەلایەن بنکەی پۆلیسی بەختیارییەوە کچەکە لەناو ماڵێکدا بدۆزرێتەوەو رادەستی باوکی بکرێتەوە".  

  

باسی لەوەشکردووە "لەئێستادا لێکۆڵینەوەکانی پۆلیس لەبارەی چۆنێتی هاتنی ئەو کچە بۆ سلێمانی و چونی بۆ ئەو ماڵەو مانەوەی لەوماڵەدا بەردەوامە".

ر. ئ.