مەودا میدیا-

ئەمڕۆ هەینی لیژنەی باڵای ئەزموونە گشتییەکانی سەر بە وەزارەتی پەروەردەی هەرێمی کوردستان ناو و شوێنی تاقیکردنەوەی خوێندکارانی پۆلی 12ـی بڵاوکردەوە و رایگەیاند، خوێندکاران دەتوانن لەڕێگە ئەم لینکەوە ناو و هۆڵی تایبەت بە تاقیکردنەوەکانیان بدۆزنەوە.

لیژنەی باڵای ئەزمونە گشتییەکان ئەمڕۆ هەینی لە راگەیەندراوێکدا ئاماژەی بەوەکرد، هەموو ئەو قوتابی و خوێندکارانەی کەمافی بەشداربوونیان بەدەستهێناوە لە تاقیکردنەوە گشتییەکانی پۆلی (12)ی ئامادەیی بۆ ساڵی خوێندنی 2021 -2022 خولی يەکەم (بەهەموو بەشەکانییەوە) دەتوانن لە رێگەی ئەو لینکەوە ناو و هۆڵی ئەزمونی خۆیان بناسن و بزانن لە چ قوتابخانە و خوێندنگە و زانکۆیەک تاقیکردنەوە ئەنجام دەدەن.

باسی لەوەشکردووە، هەروەها پێویستە دڵنیاببنەوە لە ناوی چواری و  زمانی خوێندنیان و دروستی کۆدی ئەزمونەکانیان و تەواوی داتا ئاماژەپێکراوەکان، چونکە پرسیارەکان بەگوێرەی ئایین و زمانی خوێندنیان دیاریکراوە، لەکاتی بوونی هەر هەڵەیەک تا رێکەوتی 21ی 6ی 2022 پێویستە سەردانی قوتابخانە و پەروەردەی قەزای خۆیان بکەن بۆ راستکردنەوەی هەر هەڵەیەک ئەگەر هەبێت.

لیژنەی باڵای ئەزمونە گشتییەکان ئەوەشی خستووەتەڕوو، بە پێچەوانەوە "ئێمە بەرپرسیار نابین لە بوونی هەر هەڵەیەک لەدوای رێکەوتی ئاماژەپێکراو".

ر. ئ.