مەودا میدیا-

بەڕێوەبەرایەتیی بەرەنگاربونەوەی تووندوتیژی دژی ئافرەتان و خێزان/سلێمانی دەستگیرکردنی تۆمەتبارێکی راگەیاند بە تۆمەتی خراپ بەکارهێنانی تۆڕە کۆمەڵایەتییەکان و هەڕەشەکردن لە ژنان.

لە راگەیەندراوەکەی بەڕێوەبەرایەتیی بەرەنگاربونەوەی تووندوتیژی دژی ئافرەتان و خێزان/سلێمانی هاتووە "رۆژی شەممە 18ی حوزەیرانی 2022 نووسینگەی  چەمچەماڵی سەر بە بەڕێوەبەرایەتیی بەرەنگاربوونەوەی تووندوتیژی دژی ئافرەتان و خێزان/سلێمانی تۆمەتبارێکی تۆڕە کۆمەڵایەتیەکانیان دەستگیر کرد بە ناوی (ئ .ع .خ) کە تەمەنی 21 ساڵە و دانیشتووی قەزای چەمچەماڵە".

ئاماژە بەوەکراوە  "لەناو مۆبایلەکەیدا ژمارەیەکی زۆر وێنە و ڤیدیۆی نەشیاوی تێدابوو کە هەڕەشەی لە ئافرەتان پێکردووە لە ئەگەری رازی نەبوونی ئافرەتەکان بە داواکارییەکانی تۆمەتبارەکە پاش بەدواداچوونێکی مەیدانی ورد توانرا دەستگیر بکرێت و دەست بەسەر مۆبایلەکەیدا بگیرێت".

س.ر