مەودا میدیا-

دوای کوژرانی دوو مامۆستاکەی زانکۆی سەلاحەدین لەلایەن خوێندکارێکەوە، مامۆستایەکی زانکۆ داوا لە وەزیری خوێندنی باڵا دەکات کە بۆ ماوەی چوار ساڵ بەشی یاسا دابخرێت، بەمەبەستی رێکخستنەوەی و دەشڵێت "لەئێستادا کۆمەڵگە و بازاڕی کار ھیچ پێویستی بە پسپۆڕی یاسا نییە".

لە هەژماری تایبەتی خۆی لە تۆڕی کۆمەڵایەتیی فەیسبووک لە دوای رووداوی کوشتنی ئەو دوو مامۆستایەی زانکۆی سەلاحەدین د. ئیسماعیل نامیق، مامۆستای زانکۆ نووسیوەیەتی "لێرەوە داوا لە وەزیری خوێندنی باڵا دەکەم، تکایە بۆ ماوەی چوار بۆ پێنج ساڵ ھەموو کۆلێجەکانی یاسا، بە حکومی و ئەھلییەوە دابخە، بەمەبەستی رێکخستنەوەیان، لەبەرئەوەی لەکاتی ئێستادا کۆمەڵگە و بازاڕی کار ھیچ پێویستی بە پسپۆڕی یاسا نییە!".

ئاماژەی بەوەشکردووە "کۆلیجی یاسا وای لێھاتووە، ھەر کەسێک بیەوێت دەتوانێت بیخوێنێت، ھیچ پێوەر و بنەمایەکی تێدا نەماوە، وەکو مارکێت و کافتریای لێھاتووە، ھەموو کەس دەتوانێت بیکاتەوە یان سەردانی بکات! لەکاتێکدا خوێندنی یاسا پسپۆڕییەکی زۆر تایبەتە و نابێت ھەموو کەس لەم پسپۆڕییەدا وەربگیرێت، بەڵکو دەبێت کەسی تایبەت بێت لە رووی زیرەکی، ژیریی، رەفتار و کۆمەڵێک پێوەری قورسی دیکە".

لە کۆتاییدا نووسیویشیەتی "مانەوەی کۆلێجەکانی یاسا بەم حاڵەی ئێستایانەوە، نەک خەڵکی فێری یاسا ناکەن، بەڵکو دەبنە بار بەسەر کۆمەڵگەوە، ھەوەھا دەبنە ھۆکاری بێکاریی، گەندەڵیی و زیادبوونی رێژەی تاوان و نادادیی".

ر. ئ