مەودا میدیا-

دوای ئەوەی وەزارەتی کشتوکاڵ و سەرچاوەکانی ئاوی حکومەتی هەرێمی کوردستان هەلی کارکردنی راگەیاند بۆ پێنج هەزار دەرچووی بەشەکانی کشتوکاڵ و ڤێتەنەری ئاگادارییان دەکاتەوە و ئاماژە بەشێوازی پڕکردنەوەی فۆڕمەکە دەکات.

لە راگەیەندراوەکەی وەزارەتی کشتوکاڵ و سەرچاوەکانی ئاوی حکومەتی هەرێم هاتووە "پاڵپشت بە یاسای ژمارە (20 )ی ساڵی2021 ی سەرپەرشتیارانی پرۆژەکانی کشتوکاڵی لە کەرتی تایبەت، وە ئاماژە بەڕێنمایی ژمارە (4)ی تایبەت بە جێبەجێکردنی ئەم یاسا و رێنمایی و رێکارانە، لەسەر ئاستی پارێزگاکان و ئیدارە سەربەخۆکان لێژنەی باڵای وەزاری پێکهاتوو دەست بەکاردەبێت، بە مەبەسی پاڵاوتن و وەرگرتن و زانیاری کەسی لە دەرچووانی دانەمەزراو لە بەشەکانی کشتوکاڵی و فێتێرنەری کە خواستی کارکردن و سەرپەرشتیاریان هەیە بەپێی (بڕوانامە ، پسپۆری ، ساڵی دەرچوو ، ئەزموون)".

ئاماژە بەوەشکراوە "ئەم پرۆسەیە دەسپێدەکات لەرێکەوتی 2022/7/3 تاوەکو ماوەی 2022/8/1 بەردەوام دەبێت.لەهەمانکاتدا سەرجەم فەرمانگە پەیوەندی دارەکانی وەزارەت هەماهەنگی ئامادەکاری دەکەن بۆ دانانی بەرنامەی خولی شیاندن و راهێنان بەشێوەی تیۆری و پراکتیکی و ئامادەکردنی گرێبەستی کارکردن و جێگیرکردنی ئەرک و مافەکانی سەرپەرشتیاران بەپێی ئەو میکانیزمانەی کە دانراوە هەنگاو بەهەنگاو لەچوارچێوەی یاساکە و رێنمایی ئامادەکراو".

وەزارەتی کشتوکاڵ ئەوەشی جستووەتەڕوو "بەرێزانی دەرچووی بەشەکانی کشتوکاڵی و فێتێرنەری بەپێی شوێنی جوگرافی و نیشتەجێبونی خۆیان دەتوانن سەردانی بەڕێوەبەرایەتیی گشتیی کشتوکاڵی پارێزگاکان و ئیدارە سەربەخۆکان بکەن بۆ‌ پێدانی زانیاری لەلایەن ئەو لیژنەیەی کە سەرپەرشتی تۆمارکردنی ناوەکان دەکات".

لە راگەیەندراوەکەدا ئەوەشخراوەتەڕوو "ئەم فۆرمەی پڕدەکرێتەوە بەخۆرایی دابەشدەکرێت لەسەر ئاستی فەرمانگە کشتوکاڵییەکانی هەرێمی کوردستان".

س.ر