مەودا میدیا-

بەڕێوەبەری تاوانە رێکخراوەکان لە وەزارەتی ناوخۆ رایگەیاند، بە تۆمەتی بازرگانیکردن بە مرۆڤەوە ژمارەیەک کەسی بیانی لەلایەن دادگەکانی ھەرێمی کوردستانەوە سزادراون، دەشڵێت "حەوت کەیس یەکلا کراونەتەوە و تاوانەکانی بازرگانی بە مرۆڤ زیاتر لەلایەن کەسانی بیانییەوە دەکرێن".  

  

عەقید دارا فارووق، بەڕێوەبەری تاوانە رێکخراوەکان لە وەزارەتی ناوخۆ بە ماڵپەڕی فەرمی پارتی دیموکراتی کوردستانی راگەیاندووە "رۆژی 30/7ی ھەموو ساڵێک بەپێی بڕیاری نەتەوە یەکگرتووەکان رۆژی بەرەنگاربوونەوەی بازرگانییە بە مرۆڤەوە، لەبەر ئەوەی حکومەتی عیراقیش ئەو یاسا نێودەوڵەتییەی پەسەند کردووە و یاسای بۆ بەرەنگاربوونەوەی بازرگانی بە مرۆڤەوە دەرکردووە و لەلایەن پەرلەمانی کوردستانەوە بە یاسای ژمارە 6 ساڵی 2018 بۆ بەرەنگاربوونەوەی بازرگانی بە مرۆڤەوە پەسەند کراوە". 

  

باسی لەوەشکردووە "شەش نووسینگە لە ھەرێمی کوردستان بۆ بەرەنگاربوونەوەی بازرگانی بە مرۆڤەوە کراونەتەوە و کار بۆ نەھێشتن و سزادانی ئەو کەسانە دەکەن کە بازرگانی بە مرۆڤەوە دەکەن".

  

ئەوەشی خستووەتەڕوو "زۆربەی ئەو تاوانانەی تۆمار دەکرێن لە ھەرێمی کوردستان و تایبەتن بە بازرگانی بە مرۆڤەوە، لەلایەن کەسانی بیانی ئەنجام دراون، نەک ھاوڵاتیی عیراقی و ھەرێمی کوردستان، ھەر حاڵەتێک تۆمار کرابێت، ئەوە یەکسەر بەدواداچوونی بۆ کراوە و رێکاری یاسایی گیراوەتە بەر و دوای پشتڕاستکردنەوەی رەوانەی دادگە کراون بۆ ئەوەی بەپێی یاسا سزا بدرێن، تائێستا حەوت کەیس یەکلا کراونەتەوە و لەلایەن دادگەی ھەرێمی کوردستان و تاوانبارانەوە سزا دراون بە تۆمەتی ئەنجامدانی تاوانی بازرگانی بە مرۆڤ".

ر. ئ