مەودا میدیا- سەباح خضر

وەڵامێکی تەواو بۆ بریکارەکەی سەڵاح لەسەر پێشنیارەکەی یانەی ئیتیحاد.

رامی عەباس، بریکاری ئەستێرەی لیڤەرپوڵ محەمەد سەڵاح، لێدوانی دا لەسەر ئەو دەنگۆیانەی کە لەم دواییانەدا دەربارەی ئەگەری گواستنەوەی ئەو بۆ یانەی ئیتیحادی سعودیە لە چوارچێوەی مێرکاتۆی هاوینەی ئێستادا.

بەگوێرەی راپۆرتە رۆژنامەوانییەکانی سعودیە، لە چەند کاتژمێری رابردوودا، فیدراسیۆنی سعودیە 180 ملیۆن یۆرۆی بۆ یاریزانە نێودەوڵەتییەکەی میسر بۆ ماوەی دوو وەرز پێشکەش کردووە، جگە لە 60 ملیۆن پاوەند کە یانەکەی لیڤەرپوڵ وەریگرتووە.

رامی عەباس، ئەمڕۆ دووشەممە لە هەژماری خۆی لە تۆڕی کۆمەڵایەتی تویتەر نوسیویەتی: ئەگەر بیر لەوە بکەینەوە ئەمساڵ لیڤەرپوڵ بەجێبهێڵین، هاوینی رابردوو گرێبەستەکەمان نوێ نەدەکردەوە.

ئەستێرە میسریەکە گرێبەستەکەی لەگەڵ لیڤەرپوڵ تا ساڵی 2025 هەیە و لە ئێستادا خۆی ئامادە دەکات بۆ دەستپێکردنی خولی پریمەرلیگ.

لیڤەرپوڵ لەم وەرزەدا بەشداری لە خولی چامپیۆنسلیگ ناکات بەهۆی دەرچوونی لە سندوقی زێڕینی وەرزی رابردوو.