مه‌ودا میدیا-

به‌ڕێوه‌به‌رى گشتى بازرگانى هه‌رێم رایگه‌یاند، له‌ چه‌ند رۆژى رابردوو نان و سه‌مونه‌ هه‌رزانه‌كه‌ ده‌كه‌وێته‌ بوارى جێبه‌جێكردن و ده‌بێت هه‌موو نانه‌واخانه‌ و سه‌مونخانه‌كان پێوه‌ى پابه‌ندبن.

نه‌وزاد شێخ كامیل، به‌ڕێوبه‌ره‌ى گشتى بازرگانى هه‌رێم به‌ مه‌ودا میدیاى راگه‌یاند "حكوومه‌تى هه‌رێمى كوردستان له‌ به‌رانبه‌ر هه‌رزانبوونى نان و سه‌مون، هاوكارى نانه‌واخانه‌ و سه‌مونخانه‌كان ده‌كات و پاڵپشتییان ده‌بێت".

هه‌روه‌ها وتى "نرخى كاره‌باى نیشتمانیی له‌سه‌ر سه‌مونخانه‌ و نانه‌واكان بۆ نیوه‌ كه‌مده‌كرێته‌وه‌، هه‌روه‌ها ئاردى بازرگانییان به‌ نرخى پاڵپشتیكراو بۆ دابین ده‌كرێت، كه‌ نرخه‌كه‌ى له‌ ئاردى بازرگانى بازاڕ هه‌رزانتره‌، له‌به‌رانبه‌ر ئه‌وه‌دا نان و سه‌مونیان پێ هه‌رزان ده‌كرێت و ده‌بێت 10 نان و سه‌مون بكه‌ن به‌ هه‌زار دینار".

شایه‌نى باسه‌، له‌ ماوه‌ى رابردوو به‌هۆى گرانبوونى نرخى ئاردى بازرگانى له‌ بازاڕه‌كانى هه‌رێمى كوردستان، نانه‌واكان شه‌ش نانیان كرده‌ هه‌زار دینار، هه‌ندێكیشییان كێشى نانه‌كانیان كه‌مكرده‌وه‌.

ه،ع