بەشێكی زۆر لە وتەی پێشینانی كورد هێندە جوان نەخشێنراون کە لە چەند وشەیەك پێکهاتوون، بەڵام هێندەی كتێبێك واتا دەبەخشن، بە نموونە "شێر لە بێشە هاتەدەر چ نێر بێ‌ چ مێ‌"، "لەپشت هەر پیاوێكی مەزن ژنێكی دڵسۆز‌ و كارامە ‌و سەنگین هەیە" و زۆر نموونەی تری لەو جۆرە هەیە لە ژیانی سیاسی‌ و كۆمەڵایەتیی گەلاندا.

ئەوەی جێگەی سەرنج ‌و گرنگی پێدانە لەئێستادا دەركەوتنێكی ژنێكی پێشەنگ كە سیمای شۆڕشێكی مەدەنی ‌و ئاشتیخوازانەی لەخۆی گرتووە، ئەویش خاتوو باشاك دەمیرتاش، هاوژینی سەلاحەدین دەمیرتاش، هاوسەرۆکی پێشووتری پارتی دیموکراتی گەلان- هەدەپەیە.

لەم ساڵانەی دواییدا بەشێك لە شۆڕشەكانی كورد ژنان پێشەنگ بوون تیایاندا ‌و خەباتیان كردووە لە دژی حوكمڕانیی دیكتاتۆری ‌و نادادپەروەرانە، بەتایبەت لە سێ‌ پارچەی كوردستان كە دەكرێت شەهید ژینا ئەمینی وەكو سونبولی ئەو خەباتە ناوزەدبكەین ‌و خەباتەكەشی شۆڕشی ژن- ژیان- ئازادی لێ‌ بەرهەمهات‌ و بەگیانی خۆی دەوڵەتێكی هەژاند‌ و هەموو جیهانی خستەسەر شەقام بۆ دەربڕینی هاوسۆزی‌ و پشتیوانی بۆ راپەڕاندنی ژنی كورد.

لە رۆژئاوای كوردستان ژنان بەرەنگاری گەورەترین دوژمن‌ و ترسناكترین رێكخراوی تیرۆریستی بوونەتەوە و لەجیاتی هەموو جیهان جەنگان ‌و شۆڕشێكیان بە بەرگی ژن ئاسا درووستكرد ‌و سەرنجی هەموو جیهانیان بەلای خۆیاندا راكێشا‌ و هاندەرێكی كاریگەریش بوون بۆ ژنانی تری جیهان‌ و هەر لەو رووەشەوە چەندین تێڕوانین ‌و لێكۆڵینەوە لەسەر توانا ‌و ورەی پۆڵاینیان كراوە.

ئەوەی لێرەدا گرنگە ئەگەر خاتوو باشاك دەمیرتاش بەربژێری پارتی یەكسانی‌ و دیموكراسی گەلان دەم پارتی بێت، بۆ گەورە شارەوانیی ئیستانبوڵ، پێویستە پارتە كوردییەكان لە هەڵبژاردنی شارەوانییەكانی ئەمجارەی توركیا جۆرێك لە یەكگرتووییان هەبێت، چونكە دەنگی كورد سەنگ ‌و قورسایی خۆی هەیە ‌و لە هەندێك شوێن یەكلاییەكەرەوە دەبێت بۆ سەركەوتن، بەتایبەت ئیستانبوڵ گرنگترینە سەرەڕای جیاوازی ئایدیۆلۆژیایی پارتە كوردییەكان.

ئەگەر باشاک دەمیرتاش سەركەوتن بەدەستبهێنێت، ئەوا دەبێتە نموونەیەكی پێشەنگ‌ و گۆڕانكاریی گەورە درووستدەكات ‌و رەنگدانەوەی لەسەر دەسەڵاتی حوكمڕانیش دەبێت لە توركیادا‌ و قۆناغێكی تر دێتەپێش بۆ نەتەوەی كورد لەسەر ئاستی دامەزراوە حكومییەكان ‌و چالاكییە سیاسییەكان لە تورکیا بەگشتی بە سەركەوتنی ئەو خاتوونە مێژوویەكی پرشنگدار بۆ خەباتی ژنانی كورد دەستپێدەكات ‌و ژنێك پێشەنگ دەبێت.

لە مێژووی كوردەواری ئەگەر بە پەنجەی دەستیش ئەژماربكرێت، بەڵام ژنان لەكاتی لاوازبوونی میرنشینەكانی كوردان وەكو خاتوو مەستوورەی ئەردەڵان‌ و خانزاد خاتوونی میری سۆران بەدرەوشاوەیی لە مێژووی حوكمڕانی‌ و بزووتنەوەی ژنان‌ و شۆڕشەكانی كورد دەدرەوشێنەوە‌ و هیوادارم ئەو خاتوونەش بەربژێر بكرێت ‌و سەركەوتووبێت‌ و گۆڕانكاری لە دەسەڵاتی ئەنقەرەدا رووبدات ‌و دادپەروەری بەدی بێت‌ و ئەوەی جێگەی ئاماژەیە لێرەدا ‌و گرنگە پاڵەوان سەلاحەدین دەمیرتاش، هاوسەری خاتوو باشاكە، چونكە هەمیشە سەركردەكان یان جەنگ یان نادادپەروەری ‌و داگیركاری درووستیان دەكات، بەڵام لە هزری دیموكراسی پێویستی بە پاڵپشتی هەیە، ئەوەی پێویستە لێرەدا بزووتنەوەی ژنان‌ و رێكخراوەكان ‌و پارتە كوردییەكان پاڵپشتی تەواوی ئەو خاتوونە بكەن وەك قەڵایەك لە پشتیدا بووەستن ‌و بەوەش پشتیوانییەكی عادیلانە بۆ قارەمانی زیندان سەلاحەدین دەمیرتاش مسۆگەردەكەن.
 
خ.غ