مه‌ودا میدیا-


هێزه‌كانى سه‌ر سنورى ئێران، ته‌قه‌یان له‌ ژماره‌یه‌ك كۆڵبه‌رى كورد كردووه‌ و به‌هۆیه‌وه‌ ژماره‌یه‌ك كۆڵبه‌ر برینداربوون و ته‌ندروستى چه‌ند كۆڵبه‌رێكیان ناجێگیره‌.

رێكخراوى مافى مرۆڤى هه‌نگاو بڵاویكرده‌وه‌ "له‌ سنورى هه‌نگه‌ژاڵانى سه‌ر به‌ شارى بانه‌ى رۆژهه‌ڵاتى كوردستان، سوپاى پاسدارانى ئێران، ته‌قه‌یان له‌ ژماره‌یه‌ك كۆڵبه‌ر كردووه‌ و به‌هۆیه‌وه‌ پێنج كۆڵبه‌ر برینداربوون".

به‌پێى راپۆرته‌كه‌ى مافى مرۆڤى هه‌نگاو "دوان له‌ كۆڵبه‌ره‌ كورده‌كان ته‌ندروستییان جێگیرنییه‌ و گوازراونه‌ته‌وه‌ بۆ نه‌خۆشخانه‌".

له‌ ساڵی 2023دا 22 كۆڵبه‌ری كورد كوژراون و 116 كۆڵبه‌ریش بریندار بوون، دانیشتووانی ناوچه‌ سنوورییه‌كانی رۆژهه‌ڵاتی كوردستان له‌به‌ر بێكاری و سه‌ختیی ژیان، هانایان بۆ كۆڵبه‌ری و گواستنه‌وه‌ی شتومه‌ك له‌ هه‌ردوو دیوی سنوور بردووه‌.

ع،ه