مه‌ودا میدیا-

سه‌رۆكى لیژنە ھاوبەشەکانى قائیمقامیەتی سلێمانی رایده‌گه‌یه‌نێت "له‌ باره‌ى دروستبوونى قه‌یرانى غاز و به‌رزبوونه‌وه‌ى نرخه‌كه‌ى بۆ ئه‌مساڵ، ئامادەکاری تەواویان کردووە و لیژنەیەکی تایبەتیش چاودێری ھێنان و دابەشکردن و نرخی غازی شل دەکات".

گۆران قادر، سەرۆکی لیژنە ھاوبەشەکانی قائیمقامیەتی سلێمانی ئاشكرایكرد "لیژنەیەکی تایبەتیان ھەیە بۆ چاودێریکردنی ھێنانی غازی شل بۆ ناو کارگەکان و دواتر لە رێگەی بریکارەکانەوە فرۆشتنی بە ھاوڵاتییان، لەگەڵ ئەو لیژنەیە کۆبوونەتەوە و بەرنامە و پلانی پێویستیان داناوە بۆ ئەوەی لە وەرزی سەرمادا کە خواست لەسەر غاز زیاتر دەبێت، کێشەی بڕی پێویست و نرخ دروستنەبێت".

وتیشى "وەک چۆن لە ساڵانی رابردوودا نەیانھێشتووە لە سلێمانی قەیرانی غاز دروستبێت".

روونیشیكرده‌وه‌ "ئەو لیژنەیە رۆژانە لە کاتژمێر چوار بۆ ھەشتی بەرەبەیان چاودێری کارگەکانی غاز دەکەن، دواتر چاودێری نرخ و دابەشکردنی ئەو بڕە غازە دەکەن بەسەر ھاوڵاتییاندا، رێگە بەھیچ کەس و کارگەیەک نادرێت نرخ لەسەر ھاوڵاتییان زیاد بکات".

سەرۆکی لیژنە ھاوبەشەکانی قائیمقامیەت، داواش لە ھاوڵاتییان كرد ھەر کاتێک غازیان بە زیاتر لە نرخی فەڕمیی پێفرۆشرا پەیوەندی بە لیژنە ھاوبەشەکانەوە بکەن(0770867777).

پ ح ع