راپۆرت
چیرۆكى گۆرانیبێژى به‌ناوبانگ بۆب مارلى
مەودا میدیا - سلێمانی |
هونه‌رمه‌ندێكى سه‌رمایه‌داربوو، زۆربه‌ى سامانه‌كه‌ى به‌خشى به هه‌ژاران، كۆتا وشه‌شى ئه‌وه بوو، وتى "پاره ناتوانێت ژیان بكڕێت".
مه‌ودا میدیا-
مه‌ودا میدیا-
رۆژنامه‌نووسه‌كه لێى ده‌پرسێت، پاره‌یه‌كى زۆرت ده‌ستكه‌وتووه له میوزیكه‌كه‌ته‌وه؟
له وه‌ڵامدا ده‌ڵێت: پاره؟ مه‌به‌ستت چیه؟ بڕى چه‌ند پاره زۆره له لاى تۆ؟
رۆژنامه‌نووسه‌كه‌ش ده‌ڵێت: ئه‌وه پرسیارێكى جوانه؟ كه‌واته چه‌ندت ده‌ستكه‌وتووه؟ بڵێ بیلیۆنێك دۆلاره؟
بۆب مارلى ده‌ڵێت: نا
رۆژنامه‌نووسه‌كه‌ش پرسیاره‌كه‌ى به شێوازێكى تر لێده‌كات و ده‌پرسێت: ئایا تۆ پیاوێكى ده‌وڵه‌مه‌ندى؟
دیسان بۆب مارلى ده‌پرسێته‌وه، مه‌به‌ست له پیاوێكى ده‌وڵه‌مه‌ند چیه؟
رۆژنامه‌نووسه‌كه وازناهێنێت و پێى ده‌ڵێت: تۆ سامانێكى زۆرت هه‌ڵگرتووه، پاره‌یه‌كى زۆرت له بانك داناوه؟
وه‌ڵامه پڕ جه‌وهه‌رێكه لێره‌دایه كه ئه‌و هونه‌رمه‌نده وه‌ڵامى ده‌داته‌وه و ده‌پرسێت: سامان ده‌تكات به ده‌وڵه‌مه‌ند؟ من له ئه‌و جۆره سامانه‌م نییه، سامانى من، ژیانه بۆ هه‌میشه.
هونه‌رمه‌ندى گۆرانیبێژى به‌ناوبانگ بۆب مارلی لە 6ی شووباتی 1945 لە شاری ناین مایڵز لە ویلایەتی سانت ئان لە جامایکا لەدایکبووە و لە ساڵی 1963 دەستی بە کاری هونەری کردووە، پاش تۆماركردنى چه‌ند به‌رهه‌مێك، له ساڵى 1975دا یه‌كه‌م گۆرانى نێوده‌وڵه‌تیى به ناوى (به‌بێ خانم، به‌بێ گریان) بڵاوكرده‌وه
مارلى به هه‌ژارى له كوخێك له كینگستۆن له وڵاتى جامایكا گه‌وره بوو، به‌ڵام هەرگیز رەگ و ریشەی خۆی لەبیر نەکرد. ده‌ستى كرد به كارى میوزیك و گۆرانى وه‌ك رێگه‌یه‌ك بۆ رزگاربوون له هه‌ژارى و رێگه‌یه‌ك بۆ گۆڕینى جیهان، چونكه ئه‌و یاخیبوویه‌کیش بوو کە هەرگیز لە بەکارهێنانی مۆسیقاكه‌ى بۆ بەرزکردنەوەی دەنگی خۆی لە دژی ستەمکاری نەوەستایه‌وه، ئه‌وه‌ش له پێناو گۆڕانکاری کۆمەڵایەتی.
له بوارى هونه‌ریدا گرنگییەکی نایاب و تواناى داهێنه‌رانه‌ى هه‌بوو، ئەو زیاتر بوو لە ئەستێرەیەک، ئەلبوومی "دەرچوون"ی ساڵی 1977 لەلایەن گۆڤاری تایمەوە وەک ئەلبوومی سەدە و گۆرانییەکەی "یەک خۆشەویستی" لەلایەن بی بی سی وەک گۆرانی هەزار ساڵە دەستنیشانکرا.
لە پشتیوانی راشکاوانەدا بۆ چاکسازییە دیموکراسییەکان مشتومڕێکی زۆری لەسەر بوو، تا ئه‌و راده‌یه‌ى له ساڵى 1976 و دوو رۆژ پێش كۆنسێرتێكى، هەوڵی تیرۆرکردنى ده‌درێت، به‌جۆرێك چه‌كدارێك ده‌چێته ماڵه‌‌كه‌ى و هێرش ده‌كاته سه‌رى، سه‌ربارى ئه‌وه‌ى ده‌یپێكێت، به‌ڵام له مردن رزگاری ده‌بێت، كه گومانه‌كه وابوو هۆكاره‌كه‌ى پاڵنەرێکی سیاسی بووبێت.
ئه‌وه‌ى جێگه‌ى سه‌رنجه، هه‌وڵى كوشتنه‌كه‌ى نه‌بووه هۆى وه‌ستاندنى و دوو رۆژ دواتر بۆب مارلى كۆنسێرته‌كه‌ى پێشكه‌ش كرد كه 80 هه‌زار كه‌س تێیدا ئاماده بوون، وه كاتێك لێیان پرسى بۆ پێشكه‌شت كرد له كاتێكدا تۆ پێكراویت؟ له وه‌ڵامدا وتى "ئه‌و كه‌سانه‌ى كه هه‌وڵ ده‌ده‌ن جیهان خراپتر بكه‌ن و رێگه له رۆژێكى وا بگرن، چۆن بتوانم هه‌ڵیبووه‌شێنمه‌وه".
بۆب مارلى، له مانگى 7ى 1977 تووشى شێرپه‌نجه بوو كه ده‌بوو په‌نجه‌كانى ببڕنه‌وه، به‌ڵام ره‌تى كرده‌وه كه هیچ ئه‌ندامێكى لاشه‌ى ببڕنه‌وه، هه‌ندێك باس له‌وه‌ده‌كه‌ن، هۆكارى ره‌تكردنه‌وه‌كه‌ى ئه‌وه بووه كه كاریگه‌رى ده‌كاته سه‌ر سه‌ماكردنه‌كه‌ى و ناتوانێت به باشى سه‌ما بكات، نه‌خۆشییه‌كه‌شى لە خەڵکی شارده‌وه و بەردەوام بوو لە کارکردن، تا واى لێهات شێرپەنجەكه بۆ مێشک و سییەکان و گەدەی بڵاوبووەوە.
كۆتاجار لە 11ی ئایاری 1981 و له تەمەنی 36 ساڵیدا لە نەخۆشخانەیەکی میامی کۆچی دوایی کرد و هه‌ر له جامایكا له‌گه‌ڵ گیتارێك و تۆپێكى پێ به‌خاكسپێردرا، هەواداره‌كانی لە سەرانسەری جیهان خه‌م و په‌ژاره‌یان بۆ ده‌ربڕى و پرسه‌كه‌شى لە وڵاته‌كه‌ى خۆى پرسەیەکی دەوڵەتی وەرگرت، له پاش مردنه‌كه‌شى ئەفسانەی بۆب لە جاران گەورەتر دەردەکەوێت و تاوه‌كو ئێستاش گۆرانییه‌كانى به‌رده‌وامه و كاریگه‌رى هه‌یه له‌سه‌ر هه‌موو كه‌سێك له جیهان.
هونه‌رمه‌ند بۆب مارلى له ژیانیدا زۆربه‌ى سامانه‌كه‌ى به‌خشى به خێزانه هه‌ژاره‌كان و پێوابوو مه‌زنترین پیاوێك ئه‌وه نییه چه‌ندى ده‌ستده‌كه‌وێت، ئه‌وه‌یه كه چه‌ندێك به باشى كاریگه‌رى ده‌كاته سه‌ر كه‌سانى ده‌وروپشتى. كۆتا وشه‌شى ئه‌وه بوو كه وتى "پاره ناتوانێت ژیان بكڕێت".
پ ح ع
بیروڕا
