مه‌ودا میدیا-

سه‌باره‌ت به‌ هێشتنه‌وه‌ى ئه‌و مامۆستایانه‌ى كه‌ خانه‌نشین بوون و بۆشایه‌كى گه‌وره‌یان له‌ ناوه‌نده‌كانى خوێندن دروستكردووه‌، سه‌رۆكى یه‌كێتیى مامۆستایانى كوردستان - لقى سلێمانى ده‌ڵێت  "هه‌وڵی دراوه‌ بیانهێڵنه‌وه‌ و به‌ هه‌وڵه‌كانیش گه‌شبینن".

دواى ئه‌وه‌ى به‌ بڕیارێكى ئه‌نجومه‌نى وه‌زیرانى هه‌رێمى كوردستان ژماره‌یه‌كى زۆر له‌ مامۆستایان خانه‌نشینكرا، به‌هۆى ئه‌وه‌ى بۆشایی گه‌وره‌ له‌ ناوه‌نده‌كانى خوێندن دروستده‌بێت و له‌ ئێستاشدا دامه‌زراندن نییه‌، پێشنیار كرا تاوه‌كو كۆتایی وه‌رزى دووه‌مى خوێندن ئه‌و مامۆستایانه‌ له‌ قوتابخانه‌ و خوێندنگه‌كاندا بمێننه‌وه‌.

له‌و باره‌یه‌وه‌ مامۆستا دڵشاد مه‌جید، سه‌رۆكى یه‌كێتیى مامۆستایانى كوردستان  لقى سلێمانى بۆ مه‌ودا میدیا رایگه‌یاند "له‌سه‌ر ئاستى هه‌رێم چه‌ند هه‌وڵێك هه‌یه‌ كه‌ ئه‌و مامۆستایانه‌ به‌پێى بڕیارى وه‌زاره‌تى دارایی عیراق له‌ شوێنى خۆیان بمێننه‌وه‌".

وتیشى "داوا كراوه‌ به‌ شێوه‌یه‌ك بێت كه‌ ئه‌و موچه‌یه خانه‌نشینییه‌ى وه‌رى ده‌گرن، ته‌كمیله‌یان بۆ بكرێت به‌رانبه‌ر ئه‌و موووچه‌یه‌ى له‌كاتى راژه‌كه‌یانه‌ وه‌ریان ده‌گرت".

ئاماژه‌ى به‌وه‌شكرد "ئه‌وان گه‌شبینن به‌ هه‌وڵه‌كان و پێشبینى ده‌كه‌ن ئه‌و كاره‌ جێبه‌جێبه‌جێ بكرێت، به‌ڵام ئێستا چاوه‌ڕێن مووچه‌ى مانگى یه‌ك وه‌ربگیرێت و دواتر ئه‌و بابه‌ته‌ زیاتر گفتوگۆى له‌ باره‌وه‌ ده‌كرێت".

پ ح ع