مەودا میدیا- سازگار ئەحمەد

دەنگۆی کوشتنی دوو کچ لەلایەن باوکیانەوە لە ناحیەی شۆڕشی سەر بە قەزای چەمچەماڵ بڵاودەکرێتەوە، لە ئێستادا پۆلیس دەستی کردووە بە لێکۆڵینەوە بەمەبەستی زانینی راستی رووداوەکە.

محەمەد عەبدی، بەڕێوەبەری پۆلیسی چەمچەماڵ بە مەودا میدیای رایگەیاند "لەلایەن چەند هاوڵاتییەکەوە ئاگادار کراوینەتەوە بەوەی کە باوکێک دوو کچەکەی کوشتووە و هەڵهاتووە لە ناحیەی شۆڕشی سەر بە قەزای چەمچەماڵ".

ئاماژەی بەوەشکرد "ئەو باوک و دوو کچە پێشتر لە توندوتیژی چەمچەماڵ دۆسیەیان هەبووە، لە ئێستادا ماڵەکەیان چۆڵکراوە و کەس نازانێت لە کوێن بەپێی وتەی هەندێک لە هاوڵاتییان باس لەوە دەکرێت کە باوکەکە دوو کچەکەی کوشتبێت و هەڵهاتبێت"، هەروەها ئەوەشی خستەڕوو "تاوەکو ئێستا تەرمەکان نەدۆزراونەتەوە و ئێمەش دەستمان بە لێکۆڵینەوەکان کردووە بۆ زانینی راستی رووداوەکە".

هاوکات شەریف رەحیم، جێگری بەڕێوەبەری تەندروستیی چەمچەماڵ لەو بارەیەوە بۆ مەودا میدیا وتی "هیچ تەرمێک نەهاتووەتە نەخۆشخانەی چەمچەماڵ".

س.س