مەودا میدیا - کاروان نوری

رێکخراوی مافی مرۆڤی هەنگاو رایگەیاندووە، ژنێک و کچێک لەلایەن براکانیانەوە کوژراون و بەپێی زانیارییەکانی رێکخراوەکە بەهۆی کێشەی کۆمەڵایەتییەوە بووە.
 

رێکخراوی مافی مرۆڤی هەنگاو بڵاویكردووه‌تەوه‌، شەوی دووشەممە ژنێکی خەڵکی سەردەشت، تەمەن 43 ساڵ لە گەرەکی شەهید عەلیپور، لەلایەن چەند کەسانێکەوە  لە پێش ماڵی خۆی بە چەک کوژرا.

بەپێی وتەی سەرچاوەیەکی ئاگادار ئەو ژنە ناوی وەفا عەبدوڵڵا زادەیە و ماوەیەک پێش ئێستا لە مێردەکەی جیابووەتەوە و بە تەنیا لە ماڵێکدا ژیاوە و بنەماڵەکەیشی پەیوەندییان لەگەڵی نەبووە، بەپێی زانیارییەکانی رێكخراوەکە وەفا لەلایەن براکەیەوە بەهۆی کێشەی بنەماڵەیی کوژراوە.
 
رێكخراوی هه‌نگاو ئاشكراشیكردووه "لەلایەکی دیکەوە و هەمان رۆژ، کچێکی تەمەن 22 ساڵانی خەڵکی گوندی "زۆلفەقار" لە پارێزگای ئیلام لەلایەن براکەیەوە خنکێندراوە، دواتر ناوبراو دەستگیرکراوە.