مەودا میدیا-

بنکەی بەرگریی شارستانیی کەلار ئاماری کار و چالاکییەکانی ساڵی 2020ی بڵاوکردەوە، بەپێی ئامارەکە بێت لە ماوەی ساڵی رابردوودا حەوت کەس لە ئاودا خنکاون و 29 ئۆتۆمبێل و بەنزینخانەیەک ئاگریان گرتووە.

لە راگەیەندراوێکدا بنکەی بەرگریی شارستانیی کەلار ئاماری کار و چالاکییەکانی ساڵی 2020ی بڵاوکردەوە و رایگەیاند "لە ساڵی 2020دا 234 رووداو روویانداوە، لە ماوەی یەک ساڵدا حەوت کەس لە ئاودا خنکاون".

ئاماژەی بەوەشکرد "هەر لە ساڵی 2020دا 29 ئۆتۆمبێل و بەنزینخانەیەک ئاگریان گرتووە و 30 ماڵیش سووتاون، هەروەها 88 دۆنم دەغڵودان و شەش فەرمانگەی حکومی ئاگری گرتووە".

لە راگەیەندراوەکەشدا ئاماژە بەوەشکراوە "لە ماوەی ساڵی رابردوودا 3کارگە و 2 گۆڕستان و7 دوکان ئاگریان گرتووە و بەشێکی زۆری ئەو سووتان و ئاگرکەوتنەوە کۆنترۆڵکراوە"، ئەوەشخراوەتەڕوو "شەش کارمەندی بنکەی بەرگریی شارستانی کەلار بەسووکی برینداربوون".

س.س