مەودا میدیا-

بەڕێوەبەری گشتی کەشناسی هەرێم لەبارەی ئەگەری روودانی وشکەساڵی لە هەرێمی کوردستان روونکردنەوە دەدات و ئەو ئەگەرە بە دوور دەزانێت.

فازڵ ئیبراهیم، بەڕێوەبەری گشتی كەشناسیی و بوومەلەرزەزانیی هەرێمی كوردستان لە ڤیدیۆیەکدا کە بۆ میدیاکانی ناردووە، ئاماژەی بەوەکردووە کە "بەگوێرەی ئەو ئامارانەی کە وا هەن و ئەو پێشبینیانەی کە دەکرێتن دەتوانین بڵێین وەرزی بارانبارینی ئەمساڵ جیاوازبووە لەگەڵ ساڵانی پێش خۆی بەهۆی ئەوەی باران لەسەرەتا دواکەوت".

ئاماژەی بەوەشکردووە کەمی بارانبارین دڵەڕاوکێیەکی لای هاوڵاتیان دروسترکردووە و گومانیان هەیە لەوەی ئەمساڵ وشکەساڵی بێت.

ئاشکراشیکردووە، کە بەپێی پێشبینییەکانیان لە ناوەراستی ئەم مانگەوە دووبارە وەرزی زستان خۆی نوێ دەکاتەوە و دوو تا سێ نزمە پاڵەپەستۆ دێتە ناوچەکە، ئەمەش دەبێتە هۆی بارانبارین و بەفربارین لە ناوچە شاخاوییە سنوورییەکان کە ئەمەش دەبێتە پاڵپشتییەک بۆ ئەو رێژەی کە پێشتر باریوە.

فازڵ ئیبراهیم جەختیکردووەتەوە کە ئەگەرێکی دوورە هەرێمی کوردستان دووچاری وشکەساڵی بێتەوە و دەبێت هاوڵاتیان گوومانیان لەو بارەیەوە نەبێت.

ب.م