مەودا میدیا- هەردی عوسمان

وەزارەتی دارایی و ئابووری حکومەتی هەرێمی کوردستان پارە بۆ نۆژەنکردنەوەی بەنداوی دەربەندیخان تەرخان دەکات کە بەهۆی بوومەلەرزەوە زیانی بەرکەوتبوو.

نووسینگەی سکرتارییەتی ئاوات شێخ جەناب، وەزیری دارایی و ئابووری حکومەتی هەرێمی کوردستان رایگەیاندووە "وەزیری دارایی بڕیاریداوە بە تەرخانکردنی بڕی (2٫282٫135٫000) دوو ملیار و دووسەد هەشتاو دوو ملیۆن و سەدو سی و پێنج هەزار دینار، بۆ چارەسەرکردنی زەرەر و زیانەکانی بەنداوی دەربەندیخان کە لەکاتی بوومەلەرزەکانی پێشوو پێیگەشتبوو".

چوار ساڵ پێشتر لە ساڵی 2017، بەهۆی چەند بوومەلەرزەیەکی یەک لەدوایی یەک زیان بەر بەنداوی دەربەندیخان کەوت، هەر ئەوکات بەرپرسانی بەنداوەکە رایانگەیاند "زیان بەربەنداوی دەربەندیخان کەوتووەو ئەگەر نۆژەن نەکرێتەوە ئەگەری رووخانی هەیە".

بەنداوی دەربەندیخان لەسەرەتای ساڵی 1956 ئیشکردن لە پرۆژەکە دەستیپێکرد و لە ساڵی 1961 تەواوبووە، لەسەر دەستی عەبدولکەریم قاسم، سەرۆک وەزیرانی ئەوکاتی عیراق پرۆژەکە کراوەتەوە.

س.س