مەودا میدیا-

پۆلیسی کۆنگرێس لە ئەمەریکا ئاشکرایکردووە کە دوێنێ ئۆتۆمبێلێک خۆی کردووە بە ناو کۆمەڵێک پۆلیسی پارێزەری کۆنگرێسدا لە ئەنجامدا پۆلیسێک کوژراوە و یەکێکی دیکەش برینداربووە، هەروەها دواتر تۆمەتبارەکە کوژراوە.

لە کۆنگرەیەکی رۆژنامەوانیدا وگاندانا بیتمان، بەرپرسی پۆلیسی کۆنگرێس رایگەیاند " دوێنێ هەینی 2ی نیسانی 2021 ئۆتۆمبێلێک خۆی کردووە بە ناو کۆمەڵێک پۆلیسی پارێزەری بینای کۆنگرێسدا لە ئەنجامدا پۆلیسێک کوژراوە و یەکێکی دیکەش برینداربووە".

ئاماژەی بەوەشکرد "دواتر تۆمەتبارەکە لەکاتی دابەزینی لە ئۆتۆمبێلەکەی لەلایەن پۆلیسی کۆنگرێسەوە کوژراوە، لێکۆڵینەوە لە رووداوەکە دەستیپێکردووە".

بەپێی ئەو زانیاریانەبێت کە میدیاکانی ئەمەریکا بڵاویانکردووەتەوە، هێرشبەرەکە ناوی "نوح گرینی"یە و تەمەنی 25 ساڵە، هەروەها گرین لە ئیندیانا دەژی، هەر بەپێی زانیارییە بڵاوکراوەکان بێت ئەو گەنجە لە لاپەڕەی خۆی لە تۆڕی کۆمەڵایەتیی فەیسبووک نووسیوویەتی کە شوێنکەوتووی "نەتەوەی ئیسلام" بووە.

س.س