مەودا میدیا-

جێگری سەرۆکی ئەنجومەنی نوێنەرانی عیراق ئاشکرایکرد "ئەو کەسانەی ئاستەنگ بۆ ناردنی 200 ملیار دینارەکە دروست دەکەن لەلایەن بەغداوە بۆ هەرێمی کوردستان، موزایەدەی سیاسیی دەکەن بۆ پێش هەڵبژاردن، ئەنجومەنی وەزیرانی عیراق بڕیاری لەسەرداوە و تا کۆتایی ئەم مانگە رەوانەی دەکات".

د. بەشیر حەداد، جێگری سەرۆکی ئەنجومەنی نوێنەرانی عیراق لە کۆنگرەیەکی رۆژنامەوانیدا لە سەردانێکیدا بۆ قایمقامییەتی قەزای سۆران رایگەیاند "بەغدا تا کۆتایی ئەم مانگە بڕی 200 ملیار دینار مانگانە بەمەبەستی خەرجکردنی مووچە رەوانە دەکات، ئێمە هەموو هەوڵێک دەدەین تا ئەوەی سەرجەم کێشەکانی نێوان بەغدا و هەولێر و ناوچە سنوورییەکانیش چارەسەر بکرێن".

ئاماژەی بەوەشکرد "ئەو کەسانەی ئاستەنگ بۆ ناردنی 200 ملیار دینارەکە دروست دەکەن لەلایەن بەغداوە بۆ هەرێمی کوردستان، موزایەدەی سیاسیی دەکەن و بۆ پێش هەڵبژاردن ریکلام دەکەن".

ئەمڕۆ شەممە 26ی حوزەیرانی 2021 تەنها چوار رۆژ ماوە بۆ کۆتایی مانگ، بەپێی وتەکانی بەشیر حەداد، جێگری سەرۆکی ئەنجومەنی نوێنەرانی عیراق، بەغدا لەماوەی ئەم چوار رۆژەدا 200 ملیار دینارەکە رەوانە دەکات.

پ.ح