مەودا میدیا-

بەگوێرەی زانیارییەکان بەرەبەیانی ئەمڕۆ شەڕێكی سەخت لەنێوان پەكەكە و سوپای توركیا لە دەڤەری برادۆست دروستبووە و هەپەگەش كوژرانی دەیان سەربازی توركیای راگەیاند.

بەپێی هەواڵێکی پاڵپەڕی رۆژ نیوز کە تێیدا هاتووە "لە ناوچەی برادۆست گەریلا چالاکیی گەورەیان لە دژی بنکە سەربازییەکانی دەوڵەتی تورکیا ئەنجامدا و بە دەیان سەرباز کوژران و برینداربوون".

ئەوەشی خستووەتەڕوو "بەپێی سەرچاوە خۆجێییەکان، درەنگانی شەوی رابردوو، هێزەکانی گەریلا چالاکییەکی گەورەیان دژ بە سەربازگەکانی سوپای دەوڵەتی داگیرکەری تورکیا دەستپێکردووە لە گوندەکانی چیادێل و گەروخاڵەت، لە دەشتی هێرت لە دەڤەری برادۆست و شەڕ و پێکدادان تا بەیانیی ئەمڕۆش بەردەوامبووە".

هەربەپێی هەواڵی میدیاكانی نزیک پەكەكە، لەو چالاکییانەدا بە دەیان سەربازی تورکیا کوژراون و برینداربوون و دوو جاریش هێلیکۆپتەری توركیا لە ناوچەکە نیشتووەتەوە، بۆ هەڵگرتنەوەی بریندارەکان و تەرمی کوژراوەکان.

ر. ئ.