مەودا میدیا-

سەرۆک و جێگری سەرۆک وەزیرانی حکومەتی ھەرێمی کوردستان لەبارەی کورتھێنان و گرفتە داراییەکانی سلێمانی و ھەڵەبجە و گەرمیان و راپەڕین، لەگەڵ پارێزگارەکانی سلێمانی و ھەڵەبجە و سەرپەرشتیاری ھەردوو ئیدارەی گەرمیان و راپەڕین کۆبوونەوە. 

لە راگەیەندراوی کۆبوونەوەکەدا ھاتووە، بڕیاردرا بە پێکھێنانی لیژنەیەکی ھاوبەش لە کەسانی پسپۆڕ و شارەزا لە ھەردوو وەزارەتی دارایی و ئابووری و ناوخۆ بۆ بەدواداچوونی راستییەکان سەبارەت بە داھاتە گشتییەکان وگەیشتن بە راست و دروستی ئەو قسانەی لەمبارەیەوە دەکرێن.

ھەر لە کۆبوونەوەکەدا ”بڕیاردرا پێدانی شایستەی مووچەخۆران ئەولەویەت بێت و پێش ھەر خەرجیەکی دیکە بێت و ئەو کورتھێنانەی ھەیە پڕ بکرێتەوە”.

حکومەتی ھەرێمی کوردستان جەختیکردەوە لەوەی چارەسەرکردنی گرفتەکانی مووچە و بژێوی ھاوڵاتییان ئەرکی لەپێشینەی حکومەتە و دەبێت حکومەت بەیەک چاو سەیری ھەموو ناوچەکان بکات.

لە بەشێکی دیکە راگەیەندراوی کۆبوونەوەکەدا ھاتووە ”ئەرک و بەرپرسیارێتی کابینەکەشە، چارەسەری کێشەی کورتھێنانی پارەی پێویست بۆ مووچە بکات لە ھەر پارێزگا وناوچەیەکی ھەرێم بێت”.

لە کۆبوونەوەکەدا "بڕیاردرا بە راسپاردنی وەزارەتی دارایی و ئابووری بۆ پڕکردنەوەی کورتھێنانی پارەی پێویست بۆ خەرجی مووچە لە پێش ھەر خەرجیەکی دیکە، دابینکردنی پارەی پێویست بۆ تەواو کردنی بودجەی پێویستی ئەم مانگە و لە ھەمانکاتدا لە کۆبونەوەکە بڕیاردرا بە پێکھێنانی لیژنەیەکی ھاوبەش لە کەسانی پسپۆڕ وشارەزا”.

ر. ئ.