مەودا میدیا-

لە ساڵیادی کۆچى دوایی نەوشیروان مستەفادا  بزووتنەوەى گۆڕان داواى ئاشتەوایی گشتی و دانیشتنی لایەنە کوردییەکان لەسەر مێزی گفتوگۆ دەکات.  

  

ئەمڕۆ پێنجشەممە 19ی ئایاری 2022  لە راگەیەنراوێکدا بزووتنەوەی گۆڕان ئاماژەی بەوەکرد "دوایی پێنج ساڵ لە کۆچی دوایی، یار و نەیاری ئەم سەرکردە مەزنە ددان بەو راستیەدا دەنێن ئەگەر لەکاتی خۆیدا لەجیاتی رەتکردنەوە؛ پڕۆژە و بەرنامە سیاسیەکانی کاک نەوشیروان جێبەجێ بکرایە؛ ئێستا شێوازی حوکمڕانی هەرێمی کوردستان بەم لاوازییە و بەم شێوەیە نەدەکەوتە بەر مەترسی و ئاڵنگاری دژوار، بەڵکو هەرێمێکی سەقامگیرتر و بەھێزتر و پتەومان دەبوو".   

  

باسی لەوەشکردووە "ھەربۆیە لەم یادەدا بانگەواز بۆ ئاشتەوایی گشتی و دانیشتنی لایەنە کوردییەکان لەسەر مێزی گفتوگۆ دەکەین؛ بۆ گەیشتن بە کۆڕایی سیاسیی و دانانی ستراتیجێکی نیشتیمانی بە ئامانجی چارەسەرکردنی قەیران سیاسییەکان و دروستکردنەوەی متمانەی سیاسیی لەنێوان ھاوڵاتییان و دامەزراوەکانی حوکمڕانی".  

  

  

‎«ئێستا لە ھەموو کات زیاتر پێویستمان بە کاک نەوشیروانە»  

  

‎پێنج ساڵ بەسەر کۆچی دوایی سەرکردەی دیاری سیاسی و روناکبیری کوردستان رەوانشاد (نەوشیروان مستەفا ئەمین) تێدەپەڕێت، کە لە نیو سەدە خەباتی رزگاریخوازی گەلی کوردستاندا؛ وەک سیمبولی تێکۆشان و بەگژداچوونەوەی داگیرکەران، وەک ئەندازیاری راپەرینە مەزنەکەی خەڵکی کوردستان، وەک کارەکتەرێکی کاریگەری چەسپاندنی حوکمی یاسا و حوکمڕانی رەشید، وەک خوڵقێنەری ھێزی ئۆپۆزسیۆنی سیاسیی و خەباتی مەدەنی ناوی چووەتە مێژووی پڕ سەروەری نەتەوەکەمان.  

  

‎کاک نەوشیروان لە یەک کاتدا وەک سیاسییەکی لێوەشاوە و بیرتیژ، وەک نووسەر و لێکۆڵەر، وەک ستراتیجیست و خاوەن روئیای روون و دووربین، وەک کارەکتەری خوڵقێنەری رووداوە گەورەکان لە زۆر بواردا جێپەنجەی دیاری ھەیە. لەبواری رووناکبیریدا، هەر لەسەرەتای تەمەنی گەنجییەوە، خاوەنی دیدی کوردانە و ئازادیخوازانەی  و کاریگەر بوو، لەم نێوەندەدا بە ئامانجی زیاتر خزمەتکردن و گەشەسەندنی کوردستان زۆر تویژینەوەی سیاسی و ئابووری و مێژویی و کۆمەڵناسی نووسیوە، کە لە ئەدەبیاتی سیاسی و فەرهەنگی کورددا جێگەی دیاری هەیە.  

  

‎لە دوای راپەرینەوە، جگە لە دەستپێشخەری بۆ دامەزراندنی زانکۆی سلێمانی، پڕۆژەی گشتگیری بۆ سەرلەنوێ بوونیادنانەوەی دێهاتەکانی کوردستان بەشێوەیەکی هاوچەرخ، رێکخستنەوەی کەرت و سێکتەرە جیاجیاکانی ئاوەدانکردنەوەی هەرێم هەبووە. هاوکاتیش وەک سەرکردەیەکی ریفۆرمخواز زۆر بەپەرۆشەوە بە پڕۆژە و کارنامە بەگژ گەندەڵی و نادادی دەسەڵاتدارانی کوردستان چووتەوە؛ بە ئامانجی سەرپێخستنی پڕۆسەی دەوڵەتداری و نیشتیمانسازی و دەستەبەرکردنی مافەکانی خەڵکی کوردستان، جەختی بەردەوامیشی لەسەر بە نیشتمانیکردنی هێزی پێشمەرگە و ھێزەکانی ناوخۆ و پەیوەندییە دیبلۆماسیەکانی هەرێم و دەوڵەتان دەکردوە.  

  

‎بەردەوام خەمخۆری ئاساییکردنەوەی دۆخی کەرکوک و ناوچە کوردستانییە دابڕێنراوەکان بووە و پرۆژەی سیاسی بۆ چارەسەری کێشەکان پێشکەشکردوە، لای رەوانشاد دروستبوونی دەوڵەتی کوردی نە خەون بوو، نە کەرەستەی بانگەشەی بێ بنەما، بەڵکو وەک ئامانجێکی واقعی بەدینەهاتوی کورد لێ دەروانی، هەربۆیە دروستبوونی پایەکانی دەوڵەت و حکومی دروست، بە پڕۆژە سیاسی خستبوو کارنامەی سیاسییەوە.  

  

‎ لە پەیوەندییەکانی هەرێمی کوردستان بەدەوڵەتانی ناوچەکە روون و راشکاوانە داکۆکی و بەرگری لە قەوارەی هەرێم دەکرد، دیدو بۆچونی وابوو؛ بۆ دەستەبەری مافە دەستورییەکانی خەڵکی هەرێمی کوردستان پێویستە کێشەکانی هەرێم و بەغدا لەڕێی گفتوگۆ و چارەسەرییە دەستورییەکان یەکلای بکرێتەوە.  

  

‎پڕۆژە و رێگەی سیاسیی نەوشیروان مستەفا؛ کراوە و پڕ بەرھەم و پێویستن بۆ دەرچوون لەو قەیرانە سیاسیی و ئابووری و کۆمەڵایەتیەی تێی کەوتوین، ھەربۆیە بەردەوامیدان و مانەوە بۆ ھێنانەدی ئامانجە سیاسییەکانی؛ شانازیەکی گەورەیە بۆ ئەوانەی لەسەر رێگەکەی بەردەوامی ئەدەن، ئەمڕۆش هەرێمی کوردستان لە هەرکات زیاتر پێویستی بە جێبەجێکردن و تەرجەمەکردنی روانگەی کاک نەوشیروان هەیە بۆ پاراستن و مانەوەی بە بەهێزی.  

  

‎ئێستاش دوایی پێنج ساڵ لە کۆچی دوایی، یار و نەیاری ئەم سەرکردە مەزنە ددان بەو راستیەدا دەنێن ئەگەر لەکاتی خۆیدا لەجیاتی رەتکردنەوە؛ پڕۆژە و بەرنامە سیاسیەکانی کاک نەوشیروان جێبەجێ بکرایە؛ ئێستا شێوازی حوکمڕانی هەرێمی کوردستان بەم لاوازییە و بەم شێوەیە نەدەکەوتە بەر مەترسی و ئاڵنگاری دژوار، بەڵکو هەرێمێکی سەقامگیرتر و بەھێزتر و پتەومان دەبوو. ھەربۆیە لەم یادەدا بانگەواز بۆ ئاشتەوایی گشتی و دانیشتنی لایەنە کوردییەکان لەسەر مێزی گفتوگۆ دەکەین؛ بۆ گەیشتن بە کۆڕایی سیاسیی و دانانی ستراتیجێکی نیشتیمانی بە ئامانجی چارەسەرکردنی قەیران سیاسیەکان و دروستکردنەوەی متمانەی سیاسیی لەنێوان ھاوڵاتییان و دامەزراوەکانی حوکمڕانی.  

  

دووبارە، دووپاتی دەکەینەوە، ئەگەر دەمانەوێ ھەرێمی کوردستان پارێزراو و سەقامگیرمان ھەبێ کە بەرگەی مەترسی و ھەڕەشەکان بگرێت؛ پێویستە نەخشەڕێگەی سیاسیی کاک نەوشیروان جێبەجێ بکرێت، بەتایبەتی لە یەکخستنەوە ئیدارەکان، بە نیشتیمانیکردنی ھێزەکانی پێشمەرگە و ناوخۆ، دوورخستنەوەی دەستی حیزب لە بازاڕ و کەرتی تایبەت و رێکخراوەکانی کۆمەڵگەی شارستانی، گوێگرتن لە داخوازییەکانی خەڵک و دابینکردنی مووچە و خزمەگوزارییە سەرەتاییەکان.  

  

‎ماوەتەوە بڵێین، کۆچیی دوایی نەوشیروان مستەفا، ئەگەرچی کەلێنێکی گەورەی لە تێکۆشانی ئێمە بۆ هێنانەدی ئامانجە رەواکانی خەڵکی کوردستان دروستکرد، بەڵام پشتئەستوور بە خەڵکی کوردستان و ئەوانەی رۆژێک لە رۆژان بڕوایان بە بزوتنەوەی گۆڕان ھەبووە و کاریان بۆی کردوە؛ هیوای گەورەمان هەیە؛ بە یەکخستنەوە و رێکخستنەوەی ریزی تێکۆشەرانی رێگەی چاکسازی و گۆڕانکاری لەڕێی خەباتی مەدەنی، لەسەر هەمان پرەنسیپەکانی سەرەتایی دروستبوونی گۆڕان بەردەوام دەبین ، و رێگەکەی بە روناکی و گەشاوەیی دەھێڵینەوە تا دەگەین بە حوکمڕانییەک کە لە جێی رەزامەندی خەڵکی کوردستان بێت.  

  

‎سڵاو لە گیانی پاکی سەرکردەی نیوسەدە خەبات  

‎درود بۆ گیانی شەهیدانی کوردستان  

  

‎بزووتنەوەی گۆڕان  

ر. ئ.