مەودا مدیا-

سه‌رۆكى هه‌رێمى كوردستان لەبارەی تۆپبارانەکەی سنووری زاخۆوە رایگەیاند، سوپاى توركيا و چه‌كدارانى په‌كه‌كه‌ ده‌بێ شه‌ڕ و پێكدادان رابگرن و چيتر نه‌بنه‌ هۆكارى كوشتن و وێرانكارى له‌ ناوچه‌ سنوورييه‌كان و شه‌ڕ و به‌ڵاى خۆيان له‌ يه‌خه‌ى خه‌ڵكى هه‌رێمى كوردستان بكه‌نه‌وه‌.

 

لە راگەیەندراوێکدا نێچيرڤان بارزانى، سه‌رۆكى هه‌رێمى كوردستان ئاماژەی بەوەکرد "دووباره‌بوونه‌وه‌ى بۆمبباران و به‌رده‌واميى شه‌ڕ و پێكدادانى سوپاى توركيا و چه‌كدارانى په‌كه‌كه له‌ سنووره‌كان‌، به‌ ته‌واوى ره‌تكراوه‌ و قبووڵنه‌كراوه‌ و ئاسايش و سه‌قامگيريى هه‌رێمى كوردستان و سنوورى نێوده‌وڵه‌تيى عیراقى شێواندووه‌".

 

 

زۆر به‌ توندى سه‌ركۆنه‌ى تاوانى بۆمببارانكردنى ئه‌مڕۆى سنوورى زاخۆ ده‌كه‌ين كه‌ بووه‌ هۆى گيان له‌ده‌ستدانى ژماره‌يەک هاوڵاتیى و گه‌شتيارى سڤيلى ناوچه‌ جياكانى عیراق و برينداربوونى ژماره‌يه‌كى ديكه‌يان. 

 

دووباره‌بوونه‌وه‌ى بۆمبباران و به‌رده‌واميى شه‌ڕ و پێكدادانى سوپاى توركيا و چه‌كدارانى په‌كه‌كه له‌ سنووره‌كان‌، به‌ ته‌واوى ره‌تكراوه‌ و قبووڵنه‌كراوه‌ و ئاسايش و سه‌قامگيريى هه‌رێمى كوردستان و سنوورى نێوده‌وڵه‌تيى عیراقى شێواندووه‌، هه‌روه‌ها بووه‌ته‌ هۆى چۆڵكردنى سه‌تان گوند و دێهاتى ناوچه‌كه‌.

 

پرسه‌ و سه‌ره‌خۆشيى قووڵمان ئاراسته‌ى خێزان و كه‌سوكارى قوربانييان ده‌كه‌ين و هاوده‌رد و هاوخه‌ميانين، هيواى زووچاكبوونه‌وه‌ بۆ برينداران ده‌خوازين. نه‌خۆشخانه‌ و لايه‌نه‌ په‌يوه‌نداره‌كانى هه‌رێمى كوردستان هه‌موو يارمه‌تى و خزمه‌تگوزارييه‌كى پێويست پێشكه‌ش به‌ بريندار و به‌ركه‌وتووان ده‌كه‌ن.

 

سوپاى توركيا و چه‌كدارانى په‌كه‌كه‌ ده‌بێ شه‌ڕ و پێكدادان رابگرن و چيتر نه‌بنه‌ هۆكارى كوشتن و وێرانكارى له‌ ناوچه‌ سنوورييه‌كان و شه‌ڕ و به‌ڵاى خۆيان له‌ يه‌خه‌ى خه‌ڵكى هه‌رێمى كوردستان بكه‌نه‌وه‌. حكوومه‌تى فيدراڵيى عیراقيش ده‌بێ هه‌موو رێكارێكى پێويست بگرێته‌ به‌ر بۆ ڕێگريكردن له‌ دووباره‌بوونه‌وه‌ى ئه‌و تاوانانه‌ و له‌ خاكى عیراقه‌وه‌ هه‌ڕه‌شه‌ له‌ ئاسايشى وڵاتانى دراوسێ نه‌كرێت.

ر. ئ