مەودا میدیا-

 پۆلیسی سلێمانی دەستگیركردنی سێ تۆمەتباری راگەیاند كە بۆريی راكێشانی ئاوی سەرەكیی تاسڵوجە- سلێمانی-یان دزیبوو.

لە راگەیەندراوێکی بەڕێوەبەرایەتیی پۆلیسی سلێمانی-دا هاتووە، مەفرەزەكانی‌ نووسینگەی‌ راپەڕینی‌ بەشی‌ پۆلیسی‌ نەهێشتنی‌ تاوان سێ تۆمەتباریان دەستگیركرد كە بۆريی‌ راكێشانی‌ ئاوی‌ سەرەكیی‌ تاسڵوجە- سلێمانی-یان دزیبوو.

ئاماژەی بەوەشکردووە، دوای‌ ئەوەی‌ لە نووسینگەی‌ راپەڕینی‌ بەشی‌ پۆلیسی‌ نەهێشتنی‌ تاوان سكاڵای‌ یاسایی تۆماركرا كە ژمارەیەكی‌ زۆر بۆريی‌ راكێشانی‌ ئاوی‌ سەرەكیی‌ تاسڵوجە- سلێمانی دزراون، دەستبەجێ هێزەكانی‌ پۆلیس لێكۆڵینەوەكانیان دەستپێكرد، و دوای‌ لێكۆڵینەوەكان دەركەوت تۆمەتبارەكان بۆرییەكانیان بردۆتە شاری‌ هەولێر كە نرخەكەی‌ 80 هەزار دۆلارە.

ئەوەشخراوەتەڕوو، دوای‌ وەرگرتنی‌ بڕیاری‌ دادوەر، لەماوەیەكی‌ كەمدا توانرا سێ تۆمەتبار لەلایەن مەفرەزەكانی‌ نووسینگەی‌ راپەڕینی‌ بەشی‌ پۆلیسی‌ نەهێشتنی‌ تاوانەوە دەستگیربكرێن‌، هەروەها بە هاوكاريی‌ پۆلیسی‌ هەولێر توانرا دەستبگیرێت بەسەر بۆرییەكاندا و بگەڕێنرێنەوە بۆ شاری‌ سلێمانی‌.

ر. ئ