مەودا میدیا-

سەرۆکی هەرێمی کوردستان لەسەر پەلامارەکانی شەوی رابردووی داعش لە بەغدا و چەند شارێکی دیکەی باشووری عیراق رایگەیاند، زنجيره‌ په‌لامار‌ى شه‌وى رابردووى داعش له‌ سنوورى به‌غدا، دياله‌، سەلاحه‌دين و ‏كه‌ركووک بۆ سه‌ر هێزه‌ چه‌كداره‌كان و پۆليسى فيدراڵيى عیراق كه‌ حه‌وت شه‌هيد و زياتر له‌ 20 بريندارى لێكه‌وته‌وه‌، زه‌نگى مه‌ترسييه‌كى جیديه‌.‏

 

نێچیرڤان بارزانی، سەرۆکی هەرێمی کوردستان لە راگەیەندراوێکدا ئاماژە بەوەدەکات "جموجۆڵ و به‌هێزبوونه‌وه‌ى داعش و فراوانبوونى هێرش و په‌لاماره‌كانى، هه‌ڕه‌شه‌ى ‏راسته‌قينه‌‌ له‌ ئاسايش و سه‌قامگيريى ته‌واوى عیراق ده‌كه‌ن كه‌ پێويسته‌ به‌ جیددى ‏هه‌ڵوێسته‌ى له‌سه‌ر بكرێت و وه‌ڵامى يه‌كلاكه‌ره‌وه‌ى بدرێته‌وه‌". ‏

 

"بۆ به‌ره‌نگاربوونه‌وه‌ى ئه‌و هه‌ڕه‌شانه‌ى داعش، پێويسته‌ هاريكارى و هاوئاهەنگی‏ كاراتر له‌نێوان سوپا و هێزه‌ چه‌كداره‌كان و پێشمه‌رگه‌ و ده‌زگە ئه‌منييه‌كانى عیراق و ‏هه‌رێمى كوردستاندا بكرێت. هه‌روه‌ها پێويسته‌ پشتگيريى هاوپه‌يمانيى نێوده‌وڵه‌تيى ‏دژى داعش بۆ عیراق و هه‌رێمى كوردستان به‌رده‌وام بێت"، سەرۆکی هەرێم وادەڵێت.

 

جەختیشدەکاتەوە "بارودۆخى ئه‌منى و سياسيى عیراق، هاريكارى و كارى هاوبه‌ش و پێكه‌وه‌يى له‌ ‏ته‌واوى هێز و لايه‌نه‌ عیراقييه‌كان ده‌خوازێت بۆ ئه‌وه‌ى هه‌مووان پێكه‌وه‌ ‏سه‌ختييه‌كان تێپه‌ڕێنن و چيتر دۆخى ئاڵۆزيى سياسى نه‌بێته‌ هۆكارى تێكچوونى ‏ئاسايش و سه‌قامگيریى و به‌هێزبوونه‌وه‌ى زياترى داعش".‏

 

لەکۆتایی راگەیەندراوەکەش دەڵێت "سه‌ره‌خۆشى له‌ خێزان و كه‌سوكارى شه‌هيدان ده‌كه‌م، هاوسۆز و هاوخه‌ميانم، ‏هيواى زوو چاكبوونه‌وه‌ بۆ برينداران ده‌خوازم".‏

ر. ئ