مەودا میدیا-

ئاسایشی هەولێر دەستبەسەرداگرتنی ئۆتۆمبێلێكی راگەیاند كە نۆ كیلۆ ماددەی هۆشبەری تێدابووە و بەنیازبوون بیگوازنەوە بۆ دەرەوەی وڵات و كەسێكیش دەستگیركراوە و لێكۆڵینەوەی لەگەڵ دەكرێت.

لە راگەیەندراوێكی بەڕێوەبەرایەتی ئاسایشی پارێزگای هەولێر هاتووە "هێزەكانیان توانیویانە لە ناو شاری هەولێر دەستبگرن بەسەر ئۆتۆمبێلێك كە بڕی نۆ كیلۆ ماددەی هۆشبەر لە جۆری هێرۆین و بڕێك تلیاكی تێدا بووە".

ئاماژە بەوەشكراوە "ئەو ماددەی هۆشبەرە لە ناو ئۆتۆمبێلێك شاردرابوەوە و لە وڵاتێكی دراوسێوە هاوردە كرابوو و بەنیازبوون بیگوازنەوە بۆ وڵاتی توركیا".

باس لەوەشكراوە "لەسەر ئەو ماددەیە كەسێك دەستگیركراوە بە ناوی (ا،م) و لێكۆڵینەوەی لەگەڵ دەكرێت".