مەودا میدیا-

بەڕێوەبەرایەتیی پۆلیسی پارێزگای سلێمانی رایگەیاند، تۆمەتبارێكیان دەستگیركردووە كە لەلایەن دادگای لێكۆڵینەوەی دهۆك فەرمانی دەستگیركردنی بۆ دەرچووە.

بەڕێوەبەرایەتیی گشتیی پۆلیسی سلێمانی ئەمڕۆ هەینی 2ی حوزەیرانی 2023 رایگەیاند "لەلایەن مەفرەزەكانی نوسینگەی نەهێشتنی تاوانی دزینی ئۆتۆمبێل دەستبەسەر ئۆتۆمبێلێكدا گیرا كە فەرمانی دەستبەسەرداگرتنی هەبووە".

ئاماژەی بەوەشكردووە، فەرمانی دەستبەسەرداگرتنی ئۆتۆمبێلێكە لەلایەن دادگای لێكۆڵینەوەی دهۆكەوە گەیشتووەتە بەڕێوەبەرایەتیی پۆلیسی پارێزگای سلێمانی و دەستبەجێ هێزەكانی بەشی پۆلسی نەهێشتنی تاوانی سێمانی لێكۆڵینەوە و بەدواداچوونەكانیان دەستپێكردووە.

بەپێی راگەیەندراوەكەی پۆلیسی سلێمانی، سەرەنجام توانراوە لەلایەن نووسینگەی نەهێشتنی تاوانی دزینی ئۆتۆمبێل، ئۆتۆمبێلەكە بدۆزرێتەوە و دەستیبەسەردابگیرێت و تۆمەتبارێكیش دەستگیربكرێت كە ئۆتۆمبێلەكەی پێبووە.

ئەوەش هاتووە، لەئێستادا تۆمەتبار (ر، ك ،أ)  لەدایكبووی 1991 بە بڕیاری دادوەر بەپێی مادەی 443 لە یاسای سزادانی عیراقی راگیراوە و دوای تەواوكردنی رێكارە یاساییەكان ئۆتۆمبێلەكە رادەستی شوێنی داواكراو دەكرێتەوە .
 
ژ.ع