ئابووری
نانه‌واكانى سلێمانى: 10 نان ناكه‌ین به‌هه‌زار دینار
مەودا میدیا - سلێمانی |
مه‌ودا میدیا-
به‌پێى به‌دواداچوونه‌كانى مه‌ودا میدیا، نانه‌واكانى سلێمانى ئاماده‌نین 10 نان بكه‌ن به هه‌زار دینار، له كاتێكدا حكوومه‌تى هه‌رێمى كوردستان بڕیاریداوه 10 نان و سه‌مون بكرێت به هه‌زار دینار.
ئوسامه سه‌ردار، خاوه‌نى نانه‌وا به مه‌ودا میدیاى راگه‌یاند "قورساییه‌كى زۆر له‌سه‌ر نانه‌واخانه‌كان و سه‌مونخانه‌كان هه‌یه به‌هۆى گرانى غاز و پێویستییه‌كانى تر، هاوكات هه‌موو نانه‌واو سه‌مونخانه‌كان له كرێدان، ئه‌مه وایكردووه قورسایی هه‌بێت له‌سه‌ریان، بۆیه بڕیارى كردنى 10 نان و سه‌مون به هه‌زار دینار ره‌تده‌كه‌ینه‌وه".
باسى له‌وه‌شكرد "ئه‌گه‌ر ته‌واوى كه‌لوپه‌لو و پێویستییه‌كانى وه‌ك غاز و كاره‌با و ئارد به هاوكارى له‌لایه‌ن حكوومه‌ته‌وه بۆ ئێمه دابینبكرێت ئه‌وه شتێكى باشه، به‌ڵام له‌وكاته‌دا ناچینه ژێر بارى ئه‌و بڕیاره و هیچ نانه‌وایه‌كیش 10 نانى نه‌كردووه به هه‌زار دیناره، بگره هه‌شت نانیش له‌سه‌ر نانه‌واكان قورساییه".
پێشتریش وته‌بێژى نانه‌واو سه‌مونخانه‌كان رایگه‌یاند "ئه‌وان به هیچ شێوه‌یه‌ك پابه‌ندى هه‌رزانكردنى نان نابن و قورساییه‌كى زۆر له‌سه‌ر شایانه و بگره شه‌ش نانیش بۆ ئه‌وان هێشتا قورساییه".
نه‌وزاد شێخ كامیل، به‌ڕێوبه‌رى گشتى بازرگانى هه‌رێم به مه‌ودا میدیاى راگه‌یاند "بڕیاره له دوو رۆژى رابردوو چووه‌ته بوارى جێبه‌جێكردن، نرخى كاره‌با بۆ نانه‌وا و سه‌مونخانه‌كان كراوه‌ته‌وه نیوه، هاوكات ئاردیش به نرخى هه‌رزان له ئاردى بازرگانى بۆ نانه‌واو سه‌مونخانه‌كان دابین ده‌كرێت".
شایه‌نى باسه، له ماوه‌ى هه‌فته‌ى رابردوو، پرسى هه‌رزانكردنى نان و سه‌مون نیگه‌رانى و ناڕه‌زایه‌تى نانه‌واو سه‌مونخانه‌كانى هه‌ولێرى لێكه‌وته‌وه و له خۆپیشاندانێكدا، ئیدریس مه‌سعود كه پیشه‌ى نانه‌وایه هێرشى كرده سه‌ر حكوومه‌ت و به‌رپرسانى هه‌ولێرو به‌هۆیه‌وه له لایه‌ن ئاسایشى هه‌ولێر ده‌ستگیركرا، رۆژى پێشتریش زیاتر له 600 نانه‌واى هه‌ولێر مانیانگرت و ژماره‌یه‌كیش ده‌ستگیركران.
ه،ع
بیروڕا
