‌

‎هەرێمی کوردستان بە قۆناغی سەختی سیاسی، ئابووری و ئەمنیدا تێپەڕ دەبێت، هیچ جێگەی شۆک نییە ئەگەر پێمان وابێت گرفتەکان زوو چارەسەر نەکرێن، ئەوا بێ دوودڵی داهاتوومان دەکەوێتە بەردەم گێژەڵووکەی لەناوچوون یان وێرانکردنێک کە بە ئاسانی لەبەردەمیدا خۆمان رانەگرین.

‎یەکێتیی نیشتمانیی کوردستان وەکو هێزێکی نیشتمانیی بەرپرسیار بەرانبەر نەتەوە و خاک و چارەنووسەکەی، روونە لە هەموو هێزەکانی دیکە ئەرکی قورسی لەسەر شانە، بۆیە بۆ تێپەڕبوون لەو مەترسییانەی هەیە پێویستی بە کارکردنی شێلگیرانەتر هەیە بۆ ئەوەی کوردستان و نەتەوەکەمان لەو مەترسییانە دەرباز بکات.

‎دادپەروەری بۆ دڵنیایی کۆمەڵگە لە دەستەبەرکردنی ژیانێکی شایستەدا، یەکێکە لەو فاکتەرانەی دەتوانێت ببێتە هەوێنی تەبایی و دروستکردنی متمانە لەنێوان خەڵک و حزب و دەسەڵاتدا، دەتوانێت ببێتە هۆکاری سازانی سیاسی و ئارامیی کۆمەڵایەتی، بۆیە وەکو بنەمایەکی سەرەکیی هێزێکی سۆسیال دیموکراتی وەکو یەکێتی گرنگە بیکاتە بنەمای کارکردنی رۆژانەی و بەهۆیەوە خەڵک لە دەوری خۆی زیاتر کۆبکاتەوە.

‎یەکێتی بۆ ئەوەی ببێتە هێزێکی کاریگەر لەسەر گۆڕەپانی سیاسیی هەرێمی کوردستان، پێویستیی بەوە هەیە کار لەسەر بە کردارکردنی دروشمی دادپەروەریی سیاسی و کۆمەڵایەتی و یەکسانی لە رەخساندنی دەرفەتی کاردا بکاتەوە، ئەوە بنەمایەکی گرنگە بۆ ئەوەی خەڵکی وای ببینن هێشتا هێزێکی سیاسیی هەیە کە داکۆکیکاری مافەکانیانە و دڵینا دەبن لەوەی پارێزەرێک هەیە خەمی وەگرتنەوەی مافەکانیانی لە کۆڵ ناوە.

‎دەسەڵاتی راستەقینە و هێزی سیاسیی هەڵقولاوی کۆمەڵانی خەڵک، سوورن لەسەر چەسپاندنی دادپەروەری، چونکە ئەوە بنەمایەکی گرنگە بۆ ئەوەی خەڵکی بۆ بەدەستهێنانی مافەکانیان و وەرگرتنی ئەرک و رەخساندنی دەرفەتی کار و داهاتی تاک، هیوای لەسەر هەڵبچنن، بۆیە بۆ یەکێتیی گرنگە ببێتە هێزی هێنانەکایەی دادپەروەری، لەژێر رۆشنایی بنەمای سیاسەت و جیهانبینیی سەرۆک مام جەلال کە نیو سەدە زیاتر بۆ هێنانەکایەی کۆمەڵگە و دەسەڵاتێکی دادپەروەر لە تێکۆشان بەردەوام بوو تا ئەو کاتەی بەشێکی زۆری ئامانجەکانی بۆ نەتەوەکەی بەدیهێنا.