مه‌ودا میدیا-

سەرۆک وەزیرانی عیراق ئه‌نجانى كۆبوونه‌وه‌ى له‌گه‌ڵ جۆ بایدن ئاشكرا ده‌كات و رایده‌گه‌یه‌نێت، گفتوگۆمان لەسەر رێککەوتنی ستراتیژیی نێوان عیراق و ئەمەریکا کرد و دەبێـت هه‌موو بەندەکانی چالاک بکرێت.

محەمەد شیاع سودانی، سەرۆک وەزیرانی عیراق ئاماژه‌ى به‌وه‌كرد، لە ئەمەریکا کارمان لەسەر هه‌ر یه‌كه‌ له‌ دۆسییە گرنگه‌كانى وه‌ك کەرتی وزە و گاز و بەکارهێنانی بۆ بواری کارەبا كرد و هه‌روه‌ها لەگەڵ وەزارەتی خەزێنەی ئەمریکاش له‌ كۆبوونه‌وه‌ماندا باسمان لە بانکە سزادراوەکان کردووە و لیژنەیەکی هاوبەشمان پێکھێناوە بۆ چارەسەر کردنی کێشەکە.

وتیشى، وەزارەتی خەزێنەی ئەمەریکا شایەتی ئەوەی داوە کەرتی بانکی و بانکەکان لە عیراق گەشەیان کردووە.

هاوكات سودانى ئه‌وه‌شى وت، جەختمان کردووە لە وەستاندنی جەنگی غەززە کە کێشەی گەورەی لە ناوچەکە دروستکردووە و لە ئێستادا گەلانی عیراق پێکەوە کاردەکەن و توانیویانە بەسەر تیرۆردا سەرکەون.

روونیشیكرده‌وه‌، ئێمە پێویستمان بە ئەمەریکا هەیە لەهەموو  کەرتە جیاوازەکاندا، چونکە ئەمەریکا وڵاتێکی پێشکەوتووە بۆیه‌ ئێمە دەتوانین لەیەک کاتدا پەیوەندیمان لەگەڵ ئەمەریکا و ئێراندا هەبێت و رۆڵمان هەبێت لە کەمکردنەوەی گرژییەکانی نێوانیان و عیراق توانیویەتی رۆڵی باش ببینێت لە نزیککردنەوەی ئێران و وڵاتانی ترى کەنداو.

پ ح ع