مه‌ودا میدیا-

بەبۆنەی ساڵیادی رۆژی رۆژنامەگەریی کوردی، مەکتەبی سیاسیی یەکێتی، پەیامێک بڵاوده‌كاته‌وه‌ و به‌ رۆژنامەنوسان ده‌ڵێت "لەم یادەدا  پشتیوانی خۆیان بۆ گشت رۆژنامەنوسانی کوردستان  دووپاتدەکەنەوە لەدەستڕاگەیشتن بە زانیاریی راست و دروست و فراوانکردنی پانتایی ئازادی میدیا".

دەقی پەیامه‌كه‌ی مەکتەبی سیاسیی:
 
پەیامی مەکتەبی سیاسی بەبۆنەی ساڵیادی ڕۆژی ڕۆژنامەگەریی کوردییەوە     
 
لەیادی ۱٢٦ ساڵەی  دەرچوونی یەکەمین ژمارەی ڕۆژنامەی کوردستان لەسەر  دەستی روناکبیری دوورە وڵات میقداد مەدحەت بەدرخان ،پیرۆزباییەکی گەرم لەگشت ڕۆژنامەنوسانی کورد لەکوردستان و جیهان دەکەین کە لێبڕاوانە لە کایەی میدیا وفراوانکردنی ئازادی و دیموکراسیدا  خزمەت بە کوردەوارییەکی پێشکەوتوو دەکەن.           
 
ڕۆژی ۲۲ ی نیسان ۱۸۹۸ بە بڵاوکردنەوەی یەکەمین ڕۆژنامەی کوردی دەستپێکی قۆناغێکی نوێی تێکۆشان هاتەکایەوە تا لەو ڕێگەیەوە برەو بە خەباتی داکۆکیکردن لە مافەکانی گەلەکەمان بدرێت.               

یەکێتیی نیشتمانیی کوردستان  لەسەر هەمان ڕێباز و دیدی سەرۆک مام جەلال بەردەوام دەبێت لە دابینکردنی دوانەی (نان وئازادی)  بۆ روناکبیران و ڕۆژنامەنوسان ،هەر  ئەم تێڕوانینە وایکردوە هەمیشە یەکێتی لەهەر شوێنێک بوبێت کەشی ئازادی بەرفراوانتر بووە.

لەم یادەدا جارێکیتر پشتیوانی خۆمان بۆ گشت ڕۆژنامەنوسانی کوردستان  دووپاتدەکەینەوە لە مافی دەستڕاگەیشتن بە زانیاری ڕاست و دروست و فراوانکردنی پانتایی ئازادی بۆیان لە تەواوی کوردستاندا.
کاری میدیا خزمەتێکی گشتی کۆمەڵی کوردەوارییە شایانی دەستخۆشی و پێزانینە نەک سەرکوتکردن و ڕامکردنی هەواڵ و زانیارییەکان وەک مافێکی  رای گشتی .                   

مەکتەبی  سیاسیی                                
یەکێتیی نیشتمانیی کوردستان

پ ح ع