مه‌ودا میدیا-

لێپرسراوى نووسینگه‌ى حه‌ج و عومره‌ى گه‌رمیان رایده‌گه‌یه‌نێت "به‌ هۆى ئاماده‌كارییه‌كانى وڵاتى سعودیه‌ و گرتنه‌به‌رى ئه‌و رێكارانه‌ى بۆ ده‌ستپێكردنه‌وه‌ى وه‌رزى حه‌ج پێویسته‌، له‌ ئێستادا سه‌فه‌رى عومره‌ راگیراوه‌ و هه‌ر كه‌سێك عومره‌ بكات كارى نایاسایی ئه‌نجامداوه‌".

حاجى سیروان محه‌مه‌د، لێپرسراوى نووسینگه‌ى حه‌ج و عومره‌ى گه‌رمیانى سه‌ر به‌ به‌ڕێوه‌به‌رایه‌تيی گشتيى له‌ وه‌زاره‌تى ئه‌وقافى حكومه‌تى هه‌رێم بۆ مه‌ودا میدیا رایگه‌یاند "ساڵانه‌ به‌ هۆى ئاماده‌كارى سعودیه‌ و گرتنه‌به‌رى ئه‌و رێكارانه‌ى بۆ ده‌ستپێكردنه‌وه‌ى وه‌رزى حه‌ج پێویسته‌ له‌ خزمه‌تكردنى میوانانى ماڵى خوا، به‌ مانگێك پێش جه‌ژنى قوربان سه‌فه‌رى عومره‌ راده‌گیرێت".

وتیشى "له‌ ئێستادا به‌ ته‌واوى راگیراوه‌ و ئه‌گه‌ر خه‌ڵكانێك به‌ ناوى ڤیزاى ساڵانه‌ سه‌فه‌ر ده‌كه‌ن و له‌و چوارچێوه‌یه‌ عومره‌ یان حه‌ج ئه‌نجامده‌ده‌ن، ئه‌وه‌ كارى نایاسایی ئه‌نجامداوه‌ و وڵاتى سعودیه‌ش به‌ قاچاغى ئه‌ژمار ده‌كات".

حاجى سیروان، روونیشیكرده‌وه‌ "هه‌ركه‌سێك كه‌ سه‌فه‌رى عومره‌ بكات ئه‌وان پێشوه‌خته‌ مه‌نه‌فێسیان لێوه‌رده‌گرن، به‌ڵام وا له‌ نزیكه‌ى یه‌كى ئه‌م مانگه‌وه‌ مه‌نه‌فێس له‌ هیچ كه‌س وه‌رناگرن و پێانراگه‌یاندوون به‌ هیچ شێوه‌یه‌ك عومره‌ ناكرێت".

پ ح ع