مەودا میدیا-

بریكاری وەزارەتی دارایی عیراق سەبارەت بە كۆبوونەوەی وەفدی هەرێم و وەزارەتی دارایی عیراق، ئاشکرایکرد کە گفتوگۆکانی ئەمڕۆ دەبنە بنەما بۆ 12 مانگی داهاتوو.

رێباز حەملان، بریكاری وەزارەتی دارایی عیراق رایگەیاند "گفتوگۆ لەبارەی لیستی مووچەی مانگی یەك کراوە،  لەسەر ئەم بابەتە ئەو لیژنەی كە لە وەزارەتی دارایی عیراقەوە سەردانی هەولێری کردووە هێشتا نەگەڕاوەتەوە".

ئاماژەی بۆ ئەوەشکرد "لیستی خانەنشینان تەوەرێکی تری گفتوگۆکان بووە، كە تێبینییەك هەبوو سەبارەت بەوەی لە 2025/1/1وە ئەوانەی خانەنشین دەبن بەپێی یاسای خانەنشینی یەكگرتوو دەبێت".

ئەوەشی خستەڕوو "ئەوەی لە رابردوودا حکومەتی هەرێم بۆ خانەنشینانی کردووە لەسەر داهاتەكانی خۆی بووە، نەك لەسەر تەرخانكراوی حكومەتی عیراق، بۆیە بەغدا لە 2025/1/1وە یەكخستنی خانەنشینیی هەرێم جێبەجێ دەكات".

وتیشی "كۆبوونەوەكە ئیجابی بوو، سبەینێ كاتژمێر هەشت لە وەزارەتی دارایی تیمی هەردوولا جاریکی تر کۆدەبنەوە".

ب ح