دوای نوری مالیكی، هەرێمی كوردستان رووبەڕووی دوو دیاردەی سیاسی و ئەمنی تاڵ بۆوە، دیاردە سیاسییە قورس و تاڵەكە سیاسەتە پاوانخوازییەكانی حەیدەر عەبادی سەرۆكی وەزیرانی پێشووی عیراق بوو كە بە هەموو شێوەیەك سیاسەتی لەقاڵبدانی هەرێمی كوردستانی گرتەبەر و ویستی تا دەتوانێ‌ بچووكی بكاتەوە، كە بۆی نەكرا، كورد هەڵسایەوە و عەبادی ورد ورد رێگەی ماڵی گرتەبەر، هەڵبەت نەك كورد ئەمەی پێكرد و بۆی كرا، بەڵكو لەگەڵ ناڕەزاییە ناوخۆیییە سیاسییەكان لە شێوازی بەڕێوەبردنی عەبادی، هاوكات لە راگرتنی هاوسەنگی پەیوەندییەكانی لەگەڵ ئەمریكا و ئێرانیشدا سەركەوتوو نەبوو، بۆیە نەیتوانی بەردەوام بێت و ئیتر لەوكاتەوە سەرەڕای هەوڵی بێ ئەنجام، لەژێر لێویشەوە هەر نزای سیاسییەتی.

رووداوی دووەم كە رووی ئەمنی هەیە، بریتی بوو لە دەركەوتنی رێكخراوی تیرۆریستیی داعش، داگیركارییەكانی بۆ سەر بەشێكی خاكی كوردستان، شكست و هەڵسانەوەی هێزەكانی پێشمەرگە و دواجاریش سەركەوتنی نزیك لە یەكجارەكی، لەگەڵ بوونی وردە كردەوەی تیرۆریستی كەوا كوردستان پێی نایە چۆكدا.

هەردوو رووداوەكە هەرێمی كوردستانیان بەتەواوی ماندووكرد، لەگەڵ ئەوەشدا ناتەبایی ناوخۆیی هۆكارێكی دیكە بوو، ئەگەرچی لە دەرئەنجامدا گوتاری سیاسی تائەندازەیەك لە نێوان هێزە كوردستانییەكان هاتە ئاراوە و بووە هۆكاری سەرەكی بۆ پەڕینەوەی كوردستان لە قۆناغی مەترسیداری لەناوچوون.

قۆناغی ئێستا، كە رەنگە ئەمڕۆ یان هەفتەی داهاتوو حكومەتەكەی مستەفا كازمی بكەوێتە سەرپێ و متمانەی ئەنجومەنی نوێنەرانی عیراق بەدەستبهێنێت، قۆناغێكی سەختە بۆ كوردستان، بە ئەندازەی ئەوەی مەترسییەكان گەورەتر دەبن و یەكگرتوویی كوردستانی لەبەردەم شەقبوونی زیاتر و ئاستی گەندەڵیش لە هەڵكشاندایە، هەروەك متمانەی نێوان خەڵك و حكومەتیش زیاتر كاڵ بۆتەوە و دەستی دەرەكیش زیاتر خۆی لە جەستەی كوردستان دەسوێ.

دوو مەترسی گەورە لە قۆناغی ئێستا لەسەر كوردستان هەیە:

یەكەم: نایەكگرتوویی هێزە سیاسییەكان لە هەرێمی كوردستان، نەبوونی پرۆژە و گوتاری نیشتیمانیی بە ئاراستەی مامەڵەكردن لەگەڵ عیراق و وڵاتانی دەوروبەر.

دووەم: قەیرانی ئابوووری بەهۆی نەبوونی ژێرخانێكی پتەو و خۆسازنەدان بۆ دۆخی كتوپڕ، فەرامۆشكردنی بوارەكانی كشتوكاڵ و ئاژەڵداری و تەنیا سەر خستنە سەر سەرینی نەوتی خەو زڕاو، بەو شێوەیەی كە تا دوورتر چاوەڕان ناكرێ مرۆ و ئابووری و وڵاتیش لە سایەیدا سەقامگیر بێت.

لەگەڵ ئەوانەشدا كارنامەی حكومەتەكەی كازمی، ئەوەی كە لەڕێگەی راگەیاندنەكانەوە دزەی پێكراوە، بۆ كوردستان ئاماژەی دڵخۆشكەری تێدا نییە، تەنانەت سەردانی نەكردنی سەرۆك وەزیرانی راسپێردراو بۆ را وەرگرتنی سەركردایەتیی كوردستان لە هەمبەر پێكنەهێنانی كابینەكەی، ئاماژەیە بۆ ئەوەی بێ هەرێمی كوردستانیش حكومەتی تازە پێكدێت و ئیتر كارتەكانی كوردیش هێندە بەهێزنین هۆكاربن بۆ هەڵوەشاندنەوەی كابینەیەك و پێكهێنانی كابینەیەكی دیكە.

بۆ كوردستان، باشترە دەركەوتنی مەترسییەكان بكرێنە دەرفەت بۆ خۆڕێكخستنەوە، دەربازبوون لە فرەبەرەیی و فرەدەنگی بەرانبەر یەكدەنگی ئەوانی دیكە، خۆ دیاریشە كازمی قەپی لەوان قەویترە و باشتریش بۆی دەچێتە سەر.