مەودا میدیا- سەركۆ جەمال

بۆ یەكەمجارە حكومەتی عیراق لە كاتی خۆیدا مووچە دابەش ناكات، ئەمڕۆ هەینی دەستكرا بە دابەشكردنی مووچەی فەرمانبەران بۆ مانگی شەشی 2020 و چەند رۆژێك لە وادەی خۆی دواكەوتووە.

چەند سەرچاوەیەك بە سۆمەریە نیوزیان راگەیاندووە، بانكی رافیدەین دەستی كردووە بە دابەشكردنی مووچەی فەرمانبەران و بە نامە فەرمانبەرانی عیراق ئاگادار كراونەتەوە كە بچن مووچەكانیان وەربگرن.

ئەو سەرچاوانە ئەوەشیان خستووەتەڕوو، ئەو مووچەیەی دەست بە دابەشكردنی كراوە مووچەی مانگی شەشی 2020 ە و چەند رۆژێك لە وادەی خۆی دواكەوتووە و لە رێگەی كارتی زیرەكەوە دەدرێتە فەرمانبەران.

سەرچاوەكە ئەوەشی باس كردووە، یەكەمجاریشە حكومەتی عیراق وەزارەت دوای وەزارەت مووچە دەدات، واتە لە یەك رۆژدا مووچەی هەموو وەزارەتەكان دابەش ناكرێت.

جێی ئاماژەیە حكومەتی عیراق بۆ یەكەمجارە لە دوای ساڵی 2003 ەوە مووچەی فەرمانبەرانی دوابكەوێت و ئەو مووچەیەشی دەست بە دابەشكردنی كراوە موچەی مانگی شەشی ئەمساڵە، ئەویش بەهۆی ئەو قەیرانەی بەهۆی دابەزینی نرخی نەوت رووی لە عیراق كردووە، لەكاتێكدا لە هەرێمی كوردستان لە ئێستادا دەست بە دابەشكردنی مووچەی مانگی شوباتی 2020 كراوە.